ސަރުކާރުން ނިލަންދޫގައި ހެދި ޓަރފު ދަނޑުގެ މަސައްކަތް މިހާރުވަނީ މުޅިން ނިންމާލާފައެވެ.
ރާއްޖޭގެ އެންމެ މަތީ ފެންވަރުގައި، ގައުމީ ޓީމަށާއި ނިއުރޭޑިއަންޓަށް ގިނަ ދުވަސްތަކެއްވަންދެއް ކުޅުއްވި، އަދި މިހާރު ފުޓްބޯޅަ ހިންގުމުގެ ދާއިރާގައި އެންމެ މަތީ ފެންވަރުގައި ހަރަކާތްތެރިވެވަޑައިގަންނަވަމުން ގެންދަވާ އަންވަރު ވިދާޅުވީ ދިވެހި ލީގުގައި ނިލަންދޫގެ ހޯމް މެޗުތައް ނިލަންދޫގައި ކުޅެން މިހާރު ތައްޔާރުކަމަށެވެ.
ރާއްޖޭގެ އެކި ސަރަހައްދުތަކުގައި ޓާރފް ދަނޑުއެޅުމަށް ސަރުކާރުން ފެށި ޕްރޮޖެކްޓުގެ ދަށުން،ފ. ނިލަންދޫ ދަނޑުގެ މަސައްކަތް މިހާރުވަނީ ނިންމާފައެވެ. ސަރުކާރުން އަމާޒުކޮށްފައިވަނީ، ފަސް އަހަރުގެ މުއްދަތެއްގެ ތެރޭގައި އެކި ރަށްރަށުގައި ސަތޭކަ ޓާރފް ދަނޑުއަޅާށެވެ. މީގެ ތެރެއިން ސާޅީހަކަށް ދަނޑުގެ މަސައްކަތް މިހާރު ކުރިއަށް އެބަދެއެވެ.
ނިލަންދޫ ސްޕޯޓްސް ކްލަބުގެ ރައީސް އަންވަރު އަލީ
ޕްލޭނިންގ މިނިސްޓްރީގެ ޑެޕިޔުޓީ ޑިރެކްޓަރ ޖެނެރަލް ގެ މަޤާމް ގައިވެސް ހުންނެވި ކުރީގެ މޮޅު ޑިފެންޑަރު އަންވަރު ވިދާޅުވީ ދަނޑުގެ މަސައްކަތް ނިމިފައިވާތީ، ދެން ކުރިއަށް ގެންދާނީ ދަނޑުގެ ޗޭންޖިންގ ރޫމާއި، ރެފްރީޒް ރޫމް ގެ ޖާގަ ތަނަވަސް ކުރުމުގެ މަސައްކަތެވެ. ދަނޑު ގެ މަސައްކަތް ކުރިއަށް ގެންދިޔުމުގައި ނިލަންދޫ ޑޭލައިޓް ކްލަބް ގެ ފަރާތުން ކުރަމުންގެންދާ ބުރަ މަސައްކަތަށްޓަކައި ނިލަންދޫ ސްޕޯރޓްސް ކްލަބް ގެ ފަރާތުން ވަރަށް ޚާއްޞަ ޝުކުރެއް ޑޭލައިޓްކްލަބް ގެ އެންމެހާ މެމްބަރުން ނަށް އަރިސް ކުރާވާހަކަ އަންވަރު ވިދާޅުވިއެވެ.
ދެހާސް ފަނަރަވަނަ އަހަރު، ގައުމީފުޓްބޯޅަ މުބާރާތް، ހދ. ކުޅުދުއްފުށްޓާއި އައްޑު އަތޮޅުގައި ކުރިއަށް ދިޔަ، ނިއުރޭޑިއަންޓްގެ ޑިރެކްޓަރ އޮފް ފުޓްބޯލްގެ ހައިސިއްޔަތުން ނިއު ގޮވައިގެން ކުޅުއްދުއްފުށްޓާއި، އައްޑު އަތޮޅަށް ވަޑައިގެންނެވި އަންވަރު ވިދާޅުވީ، މުޅި ރާއްޖެއަށް ފުޓްބޯޅަ ހުޅުވާލުމަށްޓަކައި، ނިލަންދޫ ނޫނަސް އެހެން ޓީމުތަކަށްވެސް އެ ޓީމެއް ނިސްބަތްވާ ރަށެއްގައި ކުޅުމުގެ ފުރުސަތު އޮންނަން ޖެހޭނެ ކަމަށެވެ.
މިނިވަން ޗެމްޕިއަންޝިޕް އަތޮޅު މުބާރާތުގެ ޝީލްޑާއި އެކު އަންވަރުގެ ދެ ކޮއްކޮ ކަމަށްވާ އަމްޖަދު އަދި އަހްމަދު
ނިލަންދޫއަކީ ދެހާސް އަށާރަވަނަ އަހަރު މިނިވަން ޗެމްޕިއަންޝިޕް އަތޮޅު މުބާރާތާއި ޒޯން މުބާރާތް އަދި މިނިވަން ޗެމްޕިއަންޝިޕްގެ ފަހު ބުރުވެސް ހޯސްޓްކުރި ރަށެވެ. އަދި ދެހާސް އަށާރަވަނަ އަހަރުން ފެށިގެން ނިލަންދޫ ސްޕޯޓްސް ކްލަބުން އަންނަނީ ރާއްޖޭގެ އެންމެ ޓޮޕް ޑިވިޝަން ކަމަށްވާ ދިވެހި ޕްރިމިއަރ ލީގުގައި ވާދަކުރަމުންނެވެ.
