އުމުރުން އަށާވީސް އަހަރުގެ، މި ސޫމޯ ރެސްލަރުގެ ނަމަކީ، ކިޔޮޓާކާ ސޫޓާކޭއެވެ. އޭނާ މަރުވީ ކޮވިޑުގައި، ހަށިގަނޑުގެ ވަރަށް ގިނަ ގުނަވަންތައް ފެއިލްވުމަށް ފަހު ކަމަށް ރިޕޯޓްތައް ބުނެއެވެ.
ކޮވިޑަށް ޕޮސިޓިވްވެ އޭނާއަށް އެންމެ ފުރަތަމަ ހޮސްޕިޓަލުގައި ފަރުވާ ދޭން ފަށާފައިވަނީ، އޭޕްރީލް މަހުގެ އަށްވަނަ ދުވަހު ކަމަށް ސީއެންއެންއިން ރިޕޯޓްކޮށްފައިވެއެވެ. އޭނގެ ހަތަރު ދުވަސްކުރިން އޭނާއަށްވަނީ ކޮވިޑަށް ޕޮސިޓިވްވިކަން އެނގިފައެވެ. އަދި އޭޕްރީލް ނަވާރަ ވަނަ ދުވަހުން ފެށިގެން އޭނާއަށް ފަރުވާ ދީފައިވަނީ އައިސީޔޫގައި ކަމަށް ޖަޕާނުގެ ސޫމޯ އެސޯސިއޭޝަނުން ބުންޏެވެ. ކިޔޮޓާކާ މަރުވެއްޖެކަން ޖަޕާނުގެ ސޫމޯ އެސޯސިއޭޝަނުން އިއުލާންކޮށްފައިވަނީ ބުދަ ދުވަހުގެ ވަގުތެއްގައެވެ.
ކިޔޮޓާކާ ސޫޓާކޭއަކީ ދެހާސް ހަތްވަނަ އަހަރުން ފެށިގެން ޕްރޮފެޝަނަލް ސޫމޯ ރެސްލިންގ އެތްލީޓެކެވެ. އޭނާވެފައިވަނީ މިހާތަނަށް ރިޕޯޓް ކުރެވުނު، ކޮވިޑްގައި މަރުވި ފުރަތަމަ އެތްލީޓަށްކަމަށް ސީއެންއެންއިން ބުނެއެވެ. ދުނިޔޭގެ އެކި ކަންކޮޅުތަކުގައި ބާރު ސްޕީޑުގައި މި ބަލި ފެތުރެމުންދާއިރު އެތައް އެތްލީޓުންނަކަށްވެސް މި ބަލި ޖެހިފައިވެއެވެ.