މިއަހަރުގެ ޝައްވާލު މަހަށް ހަނދު ސާބިތުކުރުމަށް ބޭއްވި ޖަލްސާގައި ބަޔާން އިއްވަމުން އިސްލާމިކް މިނިސްޓަރު ޑރ. އަހުމަދު ޒާހިރު ވިދާޅުވީ މާދަމާއަކީ ރަމަޟާން މަހުގެ 30 ވަނަ ދުވަސް ކަމަށެވެ.
ވީޑިއޯ ކޮންފަރެންސް މެދުވެރިކޮށް ބޭއްވި އެޖަލްސާގައި މިނިސްޓަރު ވިދާޅުވީ މިއަދުގެ އިރުއޮއްސުމަށް ފަހު، ރާއްޖޭގެ އެއްވެސް ހިސާބަކަށް އަދި ދުނިޔޭގެ އިސްލާމީ ބޮޑެތި ގައުމުތަކަށް ވެސް ހަނދު ފެނިފައިވާކަން އިތުބާރު ހުރި ގޮތަކަށް އެނގިފައި ނުވާ ކަމަށާއި ފަލަކީ އިލްމުންވެސް މިރޭ ހަނދު ފެންނާނެ ކަމަށް ނުދައްކާ ކަމަށެވެ. އެހެންކަމުން މިއަހަރުގެ ފިތުރު އީދު ދުވަހަކީ އާދިއްތަ ދުވަސް ކަމަށް ކަނޑައަޅާ ކަމަށް ވެސް މިނިސްޓަރު ވިދާޅުވި އެވެ.
އާދިއްތަ ދުވަހަކީ އީދު ދުވަހުގެ ގޮތުގައި ކަނޑައަޅާފައިވާއިރު މަސް ދުވަހަށް ވުރެ ދިގު މުއްދަތަކަށް ފަހު ރާއްޖޭގެ 25 ރަށެއް ފިޔަވައި އެހެން ރަށްރަށުގެ މިސްކިތްތަކުގައި ޖަމާއަތުގައި ނަމާދުކުރަން މިއަދު ހުކުރު ނަމާދަށް ފަހު ވަނީ ފަށާފަ އެވެ. އެ މިސްކިތްތަކުގައި ފިތުރު އީދު ނަމާދުވެސް ކުރާނެ އެވެ.
