ސިއްޙީ ޚިދުމަތްތެރިންނަށް އާޒިމް ޝުކުރު އަދާ ކުރެއްވީ، ޤާނޫނުއަސާސީއަށް ހުށަހަޅާފައިވާ އިސްލާޙު ގެނައުމުގެ ބިލަށް ބަހުސް ކުރައްވަމުން، ރޭ އޮތް ރައްޔިތުންގެ މަޖިލީހުގެ ޖަލްސާގައެވެ.
ފޭސް މާސްކަކުން މޫނު ނިވާކުރައްވައިގެން ވާހަކަ ދައްކަވަމުން، އާޒިމް ވިދާޅުވީ، ސިއްހީ ހިދުމަތްތެރިންނާއި އަދި ފުރަތަމަ ސަފުގައި މަސައްކަތް ކުރައްވާ އެންމެހާ ފަރާތްތަކުން ކުރައްވަމުން ގެންދަވަނީ ހިތްވަރުގަދަ އަދި އެހާމެ ބުރަ މަސައްކަތެއް ކަމަށެވެ. މާސްކް އަޅައިގެން އެންމެ ފަނަރަ ވަރަކަށް މިނިޓްވެސް ހުންނެވުމަކީ އުނދަގޫ ކަމެއް ކަން ފާހަގަ ކުރައްވާ އާޒިމް ވިދާޅުވީ، ސިއްހީ ހިދުމަތްތެރިން އެ ތިބެނީ އެތައް ދުވަހަކު އެ މާސްކް އަޅައިގެން އެ އުނދަގޫ ތަހައްމަލު ކުރާ ހާލު ދިވެހި ރައްޔިތުންނަށްޓަކައި ކަމަށެވެ.
ކޮވިޑްގެ ކަންތަކާއި ގުޅިގެން ސިއްހީ ޚިދުމަތްތެރިންނާއި އަދި ކަމާ ގުޅޭ އެތައް ބަޔަކު އަންނަނީ ވަރަށް ބުރަކޮށް މަސައްކަތް ކުރަމުންނެވެ. މިހާތަނަށް އާއްމުކޮށްފައިވާ މައުލޫމާތުތަކަށް ބަލާއިރު، ފްރަންޓްލައިންގައި މަސައްކަތްކުރައްވާ ދުވިސައްތައެއްހާ މީހުންވަނީ ކޮވިޑަށް ޕޮޒިޓިވްވެފައެވެ. އަދި އޭނގެ ތެރެއިން ބައެއް މީހުންވަނީ ބަލިން ރަނގަޅުވެ އަނެއްކާވެސް މަސައްކަތަށް ނުކުމެފައެވެ.
