ހިޔާ ފްލެޓުތަކުގެ ފޮޓޯއެއް ހިއްސާކުރައްވަމުން ނަޝީދު ކުރެއްވި ޓްވީޓުގައި ވިދާޅުވީ، "މިއީ ދަރަނީގެ ދަންތުރައިގެ ފޮޓޯ" އެއް ކަމަށެވެ.
އަދި ހިޔާ ފްލެޓްތައް އެވަނީ 500 އަކަފުޓީގެ ކުދި ކޮތަރު ކޮށިތަކެއް ގޮތަށް ކަމަށާއި އެތަނުން ތަނެއް ހެދުމަށްޓަކައި ހަރަދުކޮށްފައި ވަނީ އަކަފޫޓަކަށް 1900 ކަމަށް ބުނާ ކަމަށް ވެސް ނަޝީދު ވިދާޅުވެ އެވެ. އެހެންކަމުން ކުލީގެ ގޮތުގައި އެތަނަށް 11000 ރުފިޔާ ޖެހޭކަން ފާހަގަކުރައްވާ ނަޝީދު ވަނީ ދެން ދެކޮޅު ޖައްސާނީ ކިހިނެއްތޯ ސުވާލު އުފައްދަވާފަ އެވެ.
އަދި ވިދާޅުވީ އެ ފްލެޓްތައް ފިޔަވައި، ދެން ހަދާފައިވާ ގިނަ ތަންތަނަކީ އެމްޑީޕީގެ ސިޔާސަތެއް ކަމަށާއި އެތަންތަން ތަނަވަސްވާނެ ކަމަށެވެ. އަދި އަގުވެސް އެކަށީގެންވާނެ ކަމަށް ވިދާޅުވި އެވެ.
ނަޝީދު ވަނީ އަކަފޫޓަކަށް 900 ރުފިޔާގެ މަގުން އަސްލު އަގު ހުރި މަސައްކަތެއް 1900 ރުފިޔާއަށް ކުރުމުން ތަފާތުވީ ބައި ކޮބާތޯ ސުވާލު އުފައްދަވާފަ އެވެ. އަދި ޗައިނާ ކުންފުނިން ދެކޮޅު ނުޖެހޭ މިންވަރަށް އަގު އުފުލީ ދަރުވާލުމަށް ފަހު، އެ ކުންފުނިން ގަންނަންތޯ ސުވާލު އުފައްދަވަމުން ނަޝީދު ވަނީ ސްރީލަންކާ އާއި އެފްރިކާއަށްވީ އެހެން ކަމަށް ވިދާޅުވެފަ އެވެ.
ހުޅުމާލޭގައި ދެވަނަ ފިޔަވަހީގައި ޗައިނާގެ ސްޓޭޓް އިންޖީނިއަރިން އެންޑް ކޮންސްޓްރަކްޝަން ކޮމްޕެނީއާ ހަވާލުކުރި އެ މަޝްރޫއުގައި އިމާރާތްކުރަމުން ދަނީ 25 ބުރީގެ 16 ޓަވަރެވެ. އެއިން ކޮންމެ ފްލެޓެއްގެ ބޮޑު މިނަކީ 550 އަކަ ފޫޓެވެ.
އެ ފްލެޓުތައް ކުދި ކަމުން މީގެ ކުރިން ރައީސް އިބްރާހީމް މުހައްމަދު ސޯލިހު ވެސް ވަނީ އެތަނަށް ޑަބަލް ބެޑަކާއި އަލަމާރިއެއް ވެއްދުމަށް ފަހު އިތުރު ޖާގައެއް ނޯންނާނެކަމަށް ވިދާޅުވެފަ އެވެ.