ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި އެންވަޔަރަމަންޓް މިނިސްޓަރު ޑރ. ހުސެއިން ރަޝީދު ހަސަން ވިދާޅުވި ވާހަކަތަކާއި ގުޅިގެން މެމްބަރުން ވަނީ މިނިސްޓަރުގެ އިސްތިއުފާއަށް ވެސް ގޮވާލާފަ އެވެ.
އެގޮތުން މިނިސްޓަރު ވަނީ އެއްވެސް ޕްރޮޖެކްޓެއް ހިންގުމުގެ ކަންތައްތަކަކީ މިނިސްޓްރީގެ މަސްްއޫލިއްޔަތުގެ ތެރޭގައި ހިމެނޭ ކަމެއް ނޫން ކަމަށާއި އެކަމަކު އެ މިނިސްޓްރީން ފެނާއި ނަރުދަމާގެ ހިދުމަތް ދިވެހި ރައްޔިތުންނަށް ލިބޭކަން ކަށަވަރު ކުރުމުގައި ޕޮލިސީ ލެވެލްގެ މަަސައްކަތެއް ކުރާނެ ކަމަށެވެ.
އަދި ވިދާޅުވީ އެ މިނިސްޓްރީގެ މެންޑޭޓްގެ ތެރޭގައި އޮންނަ ކަމަކީ ތިމާވެއްޓާއި އެނާޖީއާ ގުޅުން ހުރި ކަންކަމުގެ ސިޔާސަތު ކަނޑައެޅުން ކަމަށާއި އުމްރާނީ ތަރައްގީއަކާ ގުޅުން ހުރި ކަމެއްގައި ވެއްޓަށް ލިބޭ ގެއްލުންތަކުގައި ޕްލޭނިން މިނިސްޓްރީއަށް ފަންނީ ލަފާ ދިނުން ކަމަށެވެ.
މިނިސްޓަރުގެ އެ ޖަވާބާ ގުޅިގެން ފުވައްމުލަކު މެދު ދާއިރާގެ މެމްބަރު ހުސައިން މުހައްމަދު ދީދީ އެ ޖަވާބަކީ ވަރަށް ނާއުންމީދީ ޖަވާބެއް ކަމަށާއި އެކަމުން އެނގިގެންދަނީ ނަރުދަމާގެ މައްސަލަ ހައްލުކުރުމުގެ މަަސައްކަތް ކުރިއަށް ނުދާނެކަން ކަމަށެވެ.
މިނިސްޓަރުގެ އިސްތިއުފާއަށް ގޮވާލައްވަމުން އޭނާ ވަނީ މިނިސްޓަރުގެ ޒިންމާތައް މަޖިލީހުގެ މެންބަރުންނަށް ސާފު ކަމަށާއި މެންބަރުން ސުވާލު ކުރައްވަނީ މިނިސްޓަރުގެ ޒިންމާތަކާ ގުޅޭ ގޮތުން ކަމަށް ވިދާޅުވެފަ އެވެ.
އަދި ފުވައްމުލަކުގެ ނަރުދަމާގެ މަސައްކަތް ފަށައި ނިމި ވަގުތީ ލައިސެންސް ދޫކުރި އިރު އޮތީ އެންވާރަމަންޓް މިނިސްޓްރީގެ ދަށުގައި ނަމަވެސް ދާއިމީ ލައިސެންސްއަށް ދިޔައިރު އެ މަސައްކަތް ވަނީ ޕްލޭނިން މިނިސްޓްރީގެ ދަށުކައި ކަމަށް ވެސް މިނިސްޓަރު ވިދާޅުވި އެވެ.