މި މަހުގެ ދެ ވަނަ ދުވަހުގެ ރޭ ގާނުނުއަސާސީ އިސްލާހުކުރުމަށް ދަންވަރު ބޭއްވި ޖަލްސާގައި މަޖިލީހުގެ ރައީސް މުހައްމަދު ނަޝީދު، ޕީޕީއެމްގެ ނައިބު ރައީސް އަދި ނައިފަރު ދާއިރާގެ މަޖިލިސް މެމްބަރު އަހުމަދު ޝިޔާމްގެ ނަން އިއްވީ މަޖިލީހުގެ ގަވައިދުގެ 65 ވަނަ މާއްދާއާ ހިލާފަށް ކަމަށް ބުނެ އެންމެ ފަހުން ބޭއްވި ޖަލްސާ ވެސް އިދިކޮޅުން ވަނީ ބޮއިކޮޓްކޮށްފަ އެވެ.
އިދިކޮޅު ކޯލިޝަނުން މިރޭ ނެރުނު ބަޔާނުގައި ބުނީ އެމްޑީޕީ މެމްބަރުން، ޝިޔާމް މަޖީލީހުގެ ތަޅުމުން ނެރުމުގައި ތަޅާ އަނިޔާކޮށްފައިވާ ކަމަށެވެ. އެ މައްސަލަ ފުލުހުންނަށް ހުށަހެޅުމުން ތަހުގީގަށް އެމްޑީޕީގެ މެމްބަރަކު ހާޒިރުކޮށްފައި ނުވާއިރު ދައުލަތުގެ ތަހުގީގީ އިދާރާއަކުން އެކަމާއި މެދު އެއްވެސް ފިޔަވަޅެއް އަޅާފައި ނުވުމުން މާދަމާގެ މަޖިލިސް ބޮއިކޮޓް ކުރަން ނިންމާފައިވާކަމަށް ބުނެ އެވެ.
އޭގެ އިތުރުން ބުނީ މައިނޯރިޓީ ނެތި މަޖިލިސް ކުރިއަށް ގެންދިއުމަކީ ޑިމޮކްރަސީގައި ނާތަހުޒީބީ އަމަލެއްކަމަށާއި މަޖިލީހުގައި މައިނޯރިޓީ ނެތުމުގެ ހުރިހާ ޒިންމާ އުފުލަން ޖެހޭނީ ރައީސް ނަޝީދު ކަމަށެވެ. އަދި ގާނޫނު އިސްލާހުކުރުމަށް ބޭއްވި ޖަލްސާގައި ހިނގާދިޔަ ކަންކަން މިނިވަން މުއައްސަސާތަކުން އިންސާފުވެރިކަމާއެކު ތަހުގީގުކުރުމަށް ވެސް ގޮވާލަ އެވެ.
