ނޭޝަނަލް އިމަޖަންސީ އޮޕަރޭޝަން ސެންޓަރު (އެންއީއޯސީ) އިން ބޭއްވި ނޫސްވެރިންގެ ބައްދަލުވުމުގައި މިރޭ މިނިސްޓަރު ވިދާޅުވީ ސައުދީ ސަރުކާރުން ހައްޖަށް މީހުން ގެންދިއުމަށް މިއަހަރު ފުރުސަތު ދޭނަމަ އެ ފުރުސަތުގެ ބޭނުން ހިފާނެ ކަމަށެވެ.
އޭގެ އިތުރުން ބައެއް ގައުމުތަކުން މިއަހަރު ހައްޖަށް މީހުން ނުގެންދާން ނިންމާފައިވީނަމަވެސް ސައުދީ ސަރުކާރުން އަންނަނީ ގައިދުރުކޮށްގެން ހައްޖުގެ އަޅުކަން ކުރެވޭނެ ގޮތެއް އޮތްތޯ ބަލަމުން ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވި ގޮތުގައި ކޮންމެ އަހަރަކު ވެސް ހައްޖުގެ އަޅުކަން އަދާކުރުމަށް 2.5 މިލިއަނެއްހާ މީހުން ސައުދީ އަރަބިއްޔާއަށް ދާއިރު މިއަހަރު ކޮވިޑް-19 އާ ގުޅިގެން ހައްޖުގެ އަޅުކަމަށްދާ މީހުންގެ އަދަދު މަދުކޮށް، ދެލައްކަ ހަތްދިހަ ހާހެއްހާ މީހުންނަށް އެ ފުރުސަތު ދޭން އެގައުމުގެ ސަރުކާރުން ނިންމާފައިވާ ކަމަށެވެ.
މިނިސްތަރު އިތުރަށް ވިދާޅުވީ މިހާރުގެ ހާލަތަށް ބެލުމަށް ފަހު މީހުން ހައްޖަށް ގެންދިއުމުގެ އަގުތަކަށް ބަދަލުތަކެއް އައުމަކީ އެކަށީގެންވާ ކަމެއް ކަމަށެވެ. އަދި ވިދާޅުވީ ހައްޖަށް މީހުން ގެންދާ ގްރޫޕްތަކުން އެކަމަށް އެދި ކުރިމަތިލާން ހުޅުވާލީ ކޮވިޑް-19 ގެ ހާލަތު އައުމުގެ ކުރިން ކަމަށާއި މިހާރު އިވެލިއުޓްކުރުމުގެ މަސައްކަތް ވެސް ކުރަމުން އަންނަ ކަމަށެވެ.
އަދި ގްރޫޕްތައް ކަނޑައެޅުމަށް ފަހު، އެ ފަރާތްތަކަށް ހައްޖަށް މީހުން ގެންދެވޭނީ ކޮން އަގެއްގައިތޯ ސާފުކުރާނެ ކަމަށެވެ. އަދި މިހާރުގެ އަގަށް ވުރެ ބޮޑު އަގެެއް ކިޔާނަމަ އެ ގުރޫޕުތަކާއި ވާހަކަަ ދައްކާ އެއްބަސްވުމަކަށް އަންނާނެ ކަމަށް ވިދާޅުވި އެވެ.
