ކުރީގެ ރައީސް ޑރ. މުހައްމަދު ވަހީދު ހަސަން މަނިކު ހަމަލާދިން މައްސަލަގައި ރައްޔިތުންގެ މަޖިލީހުގައި ބަހުސް ކުރުމަށް ގިނަ ވަގުތުތަކެއް ހޭދަ ކުރުމުން އެކަމަށް ފާޑުވިދާޅުވެ ރޭ އިދިކޮޅު ކޯލިޝަނުން ބޭއްވި ގައިދުރު ހަރަކާތުގައި ޝަރީފް ވިދާޅުވީ ތާކުންތާކުން ނުޖެހޭ ކަންކަމުގައި މަޖިލީހުގެ ވަގުތުތައް ބޭކާރު ކުރަމުން އަންނަ ކަމަށެވެ.
އަދި އެމްޑީޕީގެ ހަރުގެ އެއްގެ ގޮތުގައި މަޖިލިސް ބޭނުންކުރުމަކީ ރައްޔިތުން އެކަމާ ފުންކޮށް ވިސްނަން ޖެހޭ ކަމެއްކަން ފާހަގަކުރައްވަމުން އާދަމް ޝަރީފް ވިދާޅުވީ އެމްޑީޕީ 65 މެމްބަރުން ކުރައްވަމުން ގެންދަވާ ކަންކަން ވަރަށް ހިތިކޮށް ކުރިއަށް އޮތްތަނުގައި ފެނިގެންދާނެ ކަމަށެވެ.
އޭގެ އިތުރުން ޝަރީފް ވިދާޅުވީ ފުލުހުންގެ ބިލު، އިސްލާހުކޮށް ބަދަލުތަކެއް ގެންނަން ކުރާ މަސައްކަތަކީ ބޮޑު ދަންތުރައެއް ކަމަށާއި އިސްލާމްދީން ނައްތާލުމަށް އެ އިސްލާހުގެ ދަށުން ފުރުސަތު ލިބިގެންދާނެ ކަމަށެވެ. އެހެންކަމުން ރައީސް އަބްދުﷲ ޔާމިން ވެރިކަމާއި ހަވާލުވެވަޑައިގެން މިހާރު އޮތް ގޮތަށް އެ ބިލު ބަދަލުކުރާނެކަން ފާހަގަކުރައްވަމުން ޝަރީފް ވަނީ އެ އިސްލާހާއެކު ފުލުހުން މާޔޫސް ނުވުމަށް ވެސް އެދިވަޑައިގެންފަ އެވެ.
