ރާއްޖެއަށް ކުއްލި ނުރައްކަލުގެ ހާލަތު އިއުލާނުކޮށް، ކޮވިޑް-19 ގެ ބަލިމަޑުކަމާއި ގުޅިގެން ނެގުނު ސަލާމަތީ ފިޔަަވަޅުތަކުގެ ތެރެއިން ގައުމުގެ ބޯޑަރުތައް ބަންދުކުރުން ވެގެން ދިޔައީ މާފުށީ ރައްޔިތުންގެ މުޅި އިގްތިސޯދު އެއްކޮށް ހުއްޓިގެން ދިޔަ ކަމަކަށެވެ.

މިކަމާއި ގުޅޭ ގޮތުން މާފުށީ ކައުންސިލްގެ ރައީސް އުސްމާން ރަޝީދު ސީއެންއެމްއަށް ވިދާޅުވީ މާފުށީގެ 99 އިންސައްތަ މީހުންނަކީ ލޯކަލް ޓޫރިޒަމްގެ ވިޔަފާރީ ކުރަމުންދާ ފަރާތްތައް ކަމަށެވެ. އަދި މި ލޮކްޑައުންއާއި ގުޅިގެން އެރަށުގެ އިގްތިސޯދަށް ބޮޑު ލޮޅުމެއް އަރާފައިވާކަމަށާއި، ބޯޑަރުތައް ނުހުޅުވެ ގިނަ ދުވަސްތަކެއް ވާނަމަ މިހާރު ވަޒީފައިގައި ތިބި މަދު ފަރާތްތަކުގެ ވަޒީފާތައް ވެސް ގެއްލިގެން ދާނެ ކަމަށް އެނާ ވިދާޅުވި އެވެ.

އޭގެ އިތުރުން އިގްތިސޯދު އެއްކޮށް ހުއްޓުމަކަށް އަތުވެދާނެ ކަމުގެ ބިރު ހީވެފައިވާކަން އޭނާ ފާހަގަކުރެއްވި އެވެ. އަދި ފަތުރުވެރިކަމުގެ ސިނާއަތް ރާއްޖޭގައި ފެށުމަށް ސަރުކާރުން ކުރެވެމުންދާ މަސައްކަތްތަކަށް އަލިއަޅުވާލާ ވިދާޅުވީ ފަތުރުވެރިކަން ފެށުމަށްޓަކައި މާފުށީގައިވެސް ގިނަ މަސައްކަތް ތަކެއް ކުރެވެމުން ދާކަމަށެެވެ.

އެގޮތުން ނިއު ނޯމަލްގެ އުސޫލުތަކާއި އެއްގޮތަށް ލޯކަލް ޓޫރިޒަމް އާއި ގެސްޓްހައުސް ވިިޔަފާރީ ކުރާ ފަރާތްތަކާއި އެކު މަޝްވަރާތަކެއް ކުރެވެމުންދާކަން އޭނާ ފާހަގަކުރެއްވި އެވެ. 

މާފުށި ކައިރީގައި ވަކި ރަށެއްގެ ގޮތުގައި ތަރައްގީ ކުރެވެމުންދާ ބިމާއި ބެހޭ ގޮތުން އޭނާ ވިދާޅުވީ އެ ބިމަކީ އެރަށުގެ ރައްޔިތުންނަށް ދިމާވެފައިވާ ގެދޮރުގެ ދަތިކަން ހައްލުކުރުމަށް ތަރައްގީކުރަމުންދާ ބިމެއް ކަމަށެވެ. އަދި އެރަށުގައި ގެސްޓް ހައުސްގެ ވިޔަފާރީ ކުރަމުންދާ ހުރިހާ ފަރާތެއް އެ މަސައްކަތް ކުރަނީ އަމިއްލަ ބިންތަކުގައި ކަމަށާއި ސަރުކާރުގެ އެއްވެސް ބިމެއް އެކަމުގައި ބޭނުން ނުކުރާކަން ފާހަގަކުރެއްވި އެވެ.