މިރޭ އެންއީއޯސީން ބޭއްވި ނޫސްވެރިންގެ ބައްދަލުވުމުގައި ޖެންޑާ މިނިސްޓަރު އައިޝަތު މުހައްމަދު ދީދީ ވިދާޅުވީ، އިންކަމް ސަޕޯޓް އެލަވަންސްގެ ގޮތުގައި 5000 ރުފިޔާ ލިބޭ މީހުންގެ އާއިލާތަކުގައި ކުޑަ ކުދިން ތިބޭނަމަ އެކުދިންނަށް ވެސް އިތުރަށް ފައިސާ ލިބިގެންދާނެ ކަމަށެވެ. އެކަމަކު އެގޮތަށް ކޮންމެ ކުއްޖަކަށް ދެނީ ކިހާ ފައިސާއެއް ކަމަށް މިނިސްޓަރު ވިދާޅެއް ނުވެ އެވެ.
މިނިސްޓްރީގެ ތަފާސްހިސާބުތައް ދައްކާގޮތުން ޖޫން މަހުގެ 26 ވަނަ ދުވަހުގެ ނިޔަލަށް 1450 މީހުންނަށް ސަރުކާރުން ވަނީ އިންކަމް ސަޕޯޓް އެލަވަންސް ދޫކޮށްފަ އެވެ. އެއީ 5.8 މިލިއަން ރުފިޔާ އެވެ.
އިންކަމް ސަޕޯޓް އެލަވަންސްއަކީ ވަޒީފާ އަދާކުރާ ނުވަތަ އަމިއްލަ މަސައްކަތް ކުރާ ދިވެހި ރައްޔިތުންގެ ތެރެއިން، މާޗް އެކެއްގެ ފަހުން ވަޒީފާއިން ވަކިކޮށްފައިވާ މީހުންނާއި މުސާރަ ނުލިބޭގޮތަށް ސަސްޕެންޑް ކޮށްފައިވާ މީހުންގެ އިތުރުން މުސާރަ ނުލިބޭގޮތަށް ނޯޕޭއަށް ފޮނުވައިފައިވާ މީހުންނާއި މުސާރައިގެ ގޮތުގައި ލިބޭ އަދަދުން ބައެއް އުނިކޮށްފައިވާ ފަރާތްތަކަށް ދޭ އެލަވަންސް އެކެވެ.
