މިއަދުގެ ޖަލްސާ ފައްޓަވަމުން ރައީސް ނަޝީދު ވިދާޅުވީ މަޖިލީހުގެ އާ އިމާރާތުގެ ޓެރަސްގައި ރެސްޓޯރެންޓަކާއި ޖިމަކާއި ފިހާރައެއް ހުޅުވަނީ މަޖިލީހުގެ ސޯޝަލް ކްލަބްގެ އިސްނެގުމުގެ މަތިން ކަމަށެވެ.
ރައީސް ނަޝީދު ވިދާޅުވީ ފިހާރައިން މަޖިލީހުގެ ޖަލްސާތަކުގެ ޔައުމިއްޔާއާއި ގާނޫނުތައް ލިބެންހުންނާނެކަމަށެވެ.
މީގެ އިތުރުން ރައީސް ނަޝީދު ވިދާޅުވީ މެމްބަރުންނަށް އޮފީސް މަސައްކަތް ކުރެވޭނެ ގޮތަށް ކަންކަން ހަމަޖައްސާފައިވާކަމަށެވެ. އަދި މެމްބަރުންނަށް މުވައްޒަފުން ނަގައިގެން އެ ތަންތަނުގައި މަސައްކަތްކުރެވޭނެ ކަމަށް ވިދާޅުވި އެވެ.
މީގެ އިތުރުން ކޮމިޓީތަކުގެ މުގައްރިރުންގެ ކޮޓަރިތައް ގާއިމުކޮށް ނިންމާފައިވާކަމަށް ވެސް ރައީސް ނަޝީދު ވިދާޅުވި އެވެ. އަދި ރައްޔިތުންނާއި އެކު މަޝްވަރާ ކުރުމަށް އޮފީސްތަކާއި ރެސްޓޯރެންޓް ބޭނުންކުރެވޭނެކަން ރައީސް ނަޝީދު ފާހަގަކުރެއްވި އެވެ.