މިހާރު ޕީޖީ އޮފީހާއި ޖެންޑާ މިނިސްޓްރީ ގުޅިގެން ބާއްވަމުން އަންނަ ނޫސްވެރިންގެ ބައްދަލުވުމުގައި ޕީޖީ ޝަމީމް ވިދާޅުވީ، މިފަހަކަށް އައިސް ފެންމަތިވެފައިވާ ޖިންސީ ކުށުގެ މައްސަލަތަކެއްގައި ފުލުހުންގެ ފަރާތުން އެކަށީގެންވާ ގޮތެއްގައި ތަހުގީގު ނުކުރާކަމުގެ ޝަކުވާ ލިބިވަޑައިގެންފައިވާ ކަމަށެވެ.
ޕްރޮސެކިއުޓާ ޖެނަރަލްގެ މަސްއޫލިއްޔަތު ގާނޫނުއަސާސީން ބަޔާންކުރާ 223 ވަނަ މާއްދާގެ ދަށުން ޖިނާއީ ކުށެއްކަމަށް ތުހުމަތުކުރެވިގެން ބަލާބެލުންތަކާއި ހިންގާ ތަހުގީގުތައް ބަލައި އެކަން ހިންގަނީ ގާނޫނުތަކާއި އެއްގޮތަށްތޯ ބެލުމަކީ ޕީޖީގެ ޒިންމާއެއްކަން ފާހަގަކުރައްވަމުން ޝަމީމް ވިދާޅުވީ، ޖިންސީ ގޯނާގެ ދެ ތިން ހަތަރު މައްސަލައެއްގައި ތުހުމަތު އުފެދޭތީ އެ މައްސަލަތައް ދިރާސާކުރަން ނިންމާފައިވާ ކަމަށެވެ.
އޭގެ އިތުރުން ޝަމީމް ވިދާޅުވީ، މިއަދު އެކަމުގެ ލިޔުންތައް ފޮނުވައި ދިރާސާކުރަން ފެށުމަށް އަންގާނެ ކަމަށާއި އެގޮތުން ގާތްގަނޑަކަށް ދެ ހަފުތާގެ ތެރޭގައި އެކަން ބަލައި، ފިޔަވަޅުތަކެއް އެޅޭނެ ކަމަށް ވިދާޅުވި އެވެ.
ޝަމީމް ވިދާޅުވީ، އެފަދަ މައްސަލަތައް ހުށަހެޅުމުން ވެސް ނުބަލާ ކަމުގެ ޝަކުވާއަކީ އާންމުން ކުރަމުން އަންނަ ޝަކުވާއެއް ކަމަށާއި އެގޮތުން ދައުލަތުގެ މުަވައްސަސާއަކަށް ޖިނާއީ މައްސަލައެެއް ހުށަހަޅައިގެން އެކަން ނުބަލާނަމަ، ޕީޖީއަށް އެ މައްސަަލަ ބެލުމަށް އަމުރުކުރުމުގެ ބާރު އޮންނަ ކަމަށެވެ. އެހެންކަމުން، އެފަދަ ކަމެއް ސަމާލުކަމެއް އަތުވެއްޖެނަމަ، އެ މައްސަލަ ބަލާނެ ކަމަށް ވެސް ވިދާޅުވި އެވެ.