އެމްއެމްޕީއާރުސީގެ ކޮރަޕްޝަންގެ ތުހުމަތު ކުރެވިފައިވާ ބައްސާމް އަދީލް ޖަލީލް، އެންމެ ފުރަތަމަ އެފްއޭއެމްގެ ރައީސްކަމުގެ މަގާމު ހޯއްދެވީ، ރައްޔިތުންގެ މަޖިލީހުގެ ޕީޕީއެމް މެންބަރުންތަކެއްގެ އޭނާގެ އެކްސްކޯގައި ހިމަނައިގެންނެވެ.
ދެހާސް ސޯޅަވަނަ އަހަރު އެފްއޭއެމްގެ ރައީސްކަން ބައްސާމް ހޯދަން އެކްސްކޯއަށް ނޮމިނޭޓްކުރި އަށް މެންބަރުންގެ ތެރެއިން ހަ މެންބަރުންނަކީ މަޖިލީހުގެ މެންބަރުންނެވެ. އެއީ މަޖިލީހުގެ ތިނަދޫ ދެކުނު ދާއިރާގެ ކުރީގެ މެމްބަރު އަބްދުﷲ އަހުމަދު (އަބުޅޯ) މަޑަވެލި ދާއިރާގެ މެމްބަރު މުއާޒް މުހައްމަދު ރަޝީދާއި ދުވާފަރު ދާއިރާގެ ކުރީގެ މެމްބަރު މުހައްމަދު އަލީ އާއި ފުވައްމުލަކު ދެކުނު ދާއިރާގެ ކުރީގެ މެމްބަރު އަލީ ޝާހު އާއި ހަނިމާދޫ ދާއިރާގެ ކުރީގެ މެމްބަރު ހުސެއިން ޝަހުދީ އެވެ.
މަޖިލީހުގެ މެންބަރުންގެ އެހީތެރިކަމާއި އެކު އެފްއޭއެމްގެ ރައީސްކަމުގެ މަގާމު ހޯއްދަވައި، އަދި ފީފާގެ އުސޫލުތަކާއި ޚިލާފަށް އެފްއޭއެމް ހައުސްގައި ރައީސް ޔާމީންގެ ސިޔާސީ ހަރަކާތްތައް ހިންގުމަށް ފަހު، ބައްސާމް މިހާރު ވިދާޅުވަނީ އެފްއޭއެމްގެ އެއްވެސް މައްސަލައެއް މަޖިލީހަށް ނުބެލޭނެ ކަމަށެވެ.
އެފްއޭއެމްގެ އަސާސީ ގަވާއިދާ، އަދި ރާއްޖޭގެ ކުޅިވަރު ޤާނޫނުގެ ދަށުން ހަދާފައިވާ ކުޅިވަރު ގާނޫނަށް ގޮން ޖަހައި އެފްއޭއެމުން އިންތިހާބު ބޭއްވީ ކުޅިވަރު ގާނޫނުގެ ދަށުން ހަދާފައިވާ ގަވާއިދާ ހިލާފަށް އެފްއޭއެމްގެ އަސާސީ ގަވައިދު ބަދަލުކޮށްގެނެވެ. ބުރާސްފަތި ދުވަހު ހަވީރު އެފްއޭއެމް ހައުސްގެ ޓެރަސްގައި ބޭއްވި ކޮންގްރެސް ބާއްވާފައިވަނީ އެފްއޭއެމްގެ އަސާސީ ގަވާއިދާވެސް ޚިލާފަށެވެ.
އެފްއޭއެމްގެ އަސާސީ ގަވާއިދާ، އަދި ކުޅިވަރު ގާނޫނުގެ ދަށުން ހަދާފައިވާ ގަވާއިދާ ޚިލާފަށް ބޭއްވި އެފްއޭއެމްގެ އިންތިޚާބު، ކޮމިޝަނާ އޮފް ސްޕޯޓްސް ރަޖިސްޓްރީކޮށްދެއްވާނެ ކަމާއި މެދުވަނީ ސުވާލު އުފެދިފައެވެ.
