ބ. ބޮޑުފިނޮޅުގައި ރިސޯޓު ތަރައްގީކުރުމުގެ މަސައްކަތުގައި އުޅޭ ބަންގްލަދޭޝް ބަޔަކު އެތަނުގައި މަސައްކަތްކުރާ 13 ދިވެހިން ރަހީނު ކުރިއިރު ފުލުހުން މިއަދު ވަނީ އެ ދިވެހިން ސަލާމަތްކޮށް ހަމަނުޖެހުން ހިންގި 19 ބިދޭސީއަކު ހައްޔަރުކޮށްފައެވެ. އެ ބިދޭސީން ހަމަނުޖެހުން ހިންގާ ދިވެހިން ރަހީނުކުރީ އެމީހުނަށް ލިބެންޖެހޭ މުސާރަ ނުލިބުމުންކަމަށް މައުލޫމާތު ލިބެއެވެ.
މިމައްސަލައާ ގުޅިގެން ޑިފެންސް މިނިސްޓަރު މާރިޔާ ކުރެއްވި ޓްވީޓެއްގައި ވިދާޅުވެފައިވަނީ، ބިދޭސީންގެ ހައްގުތައް ދިފާއުކުރުމަށް ރާއްޖޭގެ ކޯޓްތަކާއި އެޗްއާރްސީއެމްގެ އިތުރުން ލޭބާ ރިލޭޝަންސް އޮތޯރިޓީ އެބައޮތް ކަމަށެވެ. އަދި އެނޫނަސް އެތައް ގާނޫނީ އިންތިޒާމުތައް ހުންނާނެކަން ފާހަގަކުރެއްވި އެވެ.
ބޮޑުފިނޮޅުގައި ބިދޭސީން ހަމަނުޖެހުން އުފައްދާ ދިވެހިން ރަހީނުކޮށްފައިވަނީ އެ މީހުނަށް ލިބެންޖެހޭ މުސާރަ ނުލިބޭތާ ގިނަ ދުވަސްތަކެއް ވުމުން އެކަމާ ހިތްހަމަނުޖެހިގެންނެވެ. އަދި މިމައްސަލައާ ގުޅިގެން، ބިދޭސީންނަށް މުސާރަ ނުދީ މަސައްކަތްކުރުވާ މައްސަލައިގައި ގިނަ ބަޔަކު އަންނަނީ ސޯޝަލް މީޑިއާގައި ނުރުހުން ފާޅުކުރަމުންނެވެ.
ބޮޑުފިނޮޅުގައި ހަމަނުޖެހުން އުފައްދާ ދިވެހިން ރަހީނުކުރި ބިދޭސީން ފުލުހުންގެ ބެލުމުގެ ދަށަށް ގެންގޮސްފައިވަނީ ފުލުހުންގެ އިސް ދެ އޮފިސަރުން ހިމެނޭ ގޮތަށް ޕަބްލިކް އޯޑާ ރެސްޕޯންސް ޔުނިޓްގެ ޓީމަކާއި ފުލުހުންގެ ތަހުގީގު ޓީމެއް ބަންގްލަދޭޝް ހައިކޮމިޝަންގެ ދެ އޮފިޝަލުންނާއި އެކު އެރަށަށް ގޮސް ކުރި މަސައްކަތުންނެވެ.