މާޒިޔާގެ ކޯޗު ސެކުލޮސްކީ އެނބުރި ދިޔައިރު، މި އަހަރުގެ ލޯކަލް ފުޓްބޯޅަ ކަލަންޑަރު ފުރިހަމަ ނުކޮށް އެފްއޭއެމުންވަނީ އެފްއޭކަޕާއި ޕްރެޒިޑެންޓްސް ކަޕް ކެންސަލްކޮށްފައެވެ. އެހެންނަމަވެސް މާޒިޔާ ވާދަކުރަމުން އަންނަ އޭއެފްސީ ކަޕުގެ ބާކީ މެޗުތައް އަންނަ އޮކްޓޫބަރު މަހަށްވަނީ ޝެޑިއުލްކޮށްފައެވެ.
އޭއެފްސީ ކަޕުގެ މެޗުތައް އަދި މާޒިޔާއަށް އޮތް ނަމަވެސް ސެކުލޮސްކީ އެނބުރި ދިޔައީ އަލުން އެނބުރި އަންނަ ގޮތަށް ކަމެއް އަދި ނޭނގެއެވެ. އޭނާ ބުނީ މި ވަގުތު ބޭނުންވަނީ އާއިލާއާއި އެކު ވަގުތުކޮޅެއް ހޯދަން ކަމަށެވެ.
ސެކުލޮސްކީ އެނބުރި ގައުމަށް މިދިޔައީ ލޮކްޑައުންއާ ގުޅިގެން ގިނަ ދުވަސްތަކެއް ވަންދެން މާލޭގައި ތާށިވެފައި ހުރުމަށް ފަހުއެވެ. ސެކުލޮސްކީގެ އިރުޝާދުގެ ދަށުން މާޒިޔާއިން ދިވެހި ލީގު ކާމިޔާބުކޮށް އަންނަ އަހަރުގެ އޭއެފްސީ ކަޕުން ފުރުސަތު ހޯދާފައިވާއިރު، މި އަހަރުގެ އޭއެފްސީ ކަޕުގައި މާޒިޔާއިންވަނީ އިންޑިޔާގެ ބެންގަލޫރު، ޕްލޭ އޮފްގައި ކަޓުވާލުމަށް ފަހު ގްރޫޕް ސްޓޭޖުން ޖާގަ ހޯދާފައެވެ. ކޮވިޑާ ގުޅިގެން އޭއެފްސީ ކަޕު މެދު ކަނޑާލިއިރު މާޒިޔާއިންވަނީ އެއް މެޗު ކުޅެފައެވެ.
