އިންޑިއާގެ ނޫހަކަށް ސުޝާންތުގެ އާއިލާއާ ގާތް ގުޅުމެއް އޮންނަ ފަރާތަކުން ބުނި ގޮތުގައި ސުޝާންތުގެ ބައްޕަ ޓްވީޓާއަކު ނޫޅެ އެވެ. އެނަަމުގައި ހަދާފައި ވަނީ ފޭކް އެކައުންޓެއް ކަމަށާއި އެގޮތަށް މީހުންނަށް އޮޅޭ ގޮތަށް ކަންކަން ނުކުރުމަށް އާންމުންގެ ކިބައިން އެމީހާ އެދިފައިވެ އެވެ.
ސުޝާންތުގެ ބައްޕަ ކަމަށް ބުނެ ހަދާފައިވާ އެ ޓްވީޓާ އެކައުންޓުން ކުރި ޓްވީޓެއްގައި ވަނީ ސުޝާންތު، ބަޔަކު މަރާލީ ކަމަށާއި އޭނާ މަރުވީ އަމިއްލައަށް ނޫން ކަމަށް ބުނެފަ އެވެ.
އޭނާ މަރުވި ގޮތުގެ ތަހުގީގު ފުލުހުން ކުރަމުން އަންނައިރު ޕޯސްޓްމޯޓަމުން ދައްކާ ގޮތުގައި އޭނާ މަރުވީ އަމިއްލައަށެވެ. އެކަމަކު އަދިވެސް ފުލުހުން ދަނީ އެ ތަހުގީގުކުރަމުންނެވެ.
އެ އާއިލާއިން ސުޝާންތާއި ގުޅިގެން ބަޔާނެއް ނެރުނީ މިދިޔަ މަހުގެ 27 ގަ އެވެ. އެ ބަޔާނުގައި ވެސް ވަނީ ސުޝާންތު ކުޅިވަރަށް ހުންނަ ލޯތްބާއި އޭނާގެ ފިލްމީ ދާއިރާއާ ގުޅޭ ކަންކަމުގެ މައުލޫމާތު ހިއްސާކޮށްފަ އެވެ.
އުމުރުން 34 އަހަރުގައި ސުޝާންތު މަރުވިއިރު އޭނާ އެންމެ ފަހުން ފެނިގެންދިޔައީ ޝްރައްދާ ކަޕޫރާއެކު "ޗިޗޯރު" އިންނެވެ. "ދޯނީ: ދަ އަންޓޯލްޑް ސްޓޯރީ" އާއި ކެދާނަތުގެ އިތުރުން ވެސް ހިޓު ފިލްމުތަކަކުން އޭނާ ފެނިގެންދިޔަ އެވެ.