ހިޔާ ފްލެޓުތަކުގައި ފަންކާ ހަރުނުކޮށް އަދި ތަށިމުށި ނުޖަހާ، ހަވާލުކުރިޔަސް އެތަންތަނުގެ އަގު މާބޮޑު ތަނަކުން ހެޔޮ ނުވާނެ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފައިވަނިކޮށް ބޯހިޔާވަހިކަމުގެ މަޝްރޫއުތަކާއި ގުޅޭ މައުލޫމާތު ހިއްސާކުރުމަށް މިއަދު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަސްލަމް ވިދާޅުވީ، ފިނިޝިންގެ މަސައްކަތްނުކޮށް، 11000 ރުފިޔާ ދައްކަން ޖެހޭނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވި އަޑު އިވިފައި ނުވާ ކަމަށެވެ.
އޭގެ އިތުރުން އަސްލަމް ވިދާޅުވީ، އިންޓަރެސްޓް ރޭޓް ކުޑަކުރުމަށް ފަހު ރައްޔިތުންނަށް "މިވެނި ވަރެއް [11000 ރުފިޔާ]" ދައްކަން ޖެހޭނެ ކަމަށް ރައީސް ވިދާޅުވި ހަނދުމަ ނުވާނެކަމަށެވެ.
މިހާރު ކަނޑައަޅާފައިވާ ގޮތުން ދެ ކޮޓަރީގެ ފްލެޓަކަށް މަހަކު 11000 ރުފިޔާ ދައްކަން ޖެހެ އެވެ. އެޗްޑީސީގެ މެނޭޖިން ޑިރެކްޓަރު ސުހައިލް އަހުމަދު ސީއެންއެމްއަށް ވިދާޅުވީ މިހާރު، ފަންކާ އަދި ތަށިމުށި ނުޖަހާ އެތަންތަން ހަވާލުކުރި ނަމަވެސް އެތަންތަނުގެ ކުލި ކުޑަވާނީ އެންމެ ދިހަ އިންސައްތައަށް ކަމަށެވެ.
ކުރީގެ ރައީސް އަބްދުﷲ ޔާމީނުގެ ވެރިކަމުގައި ފްލެޓަކަށް ކަނޑައަޅާފައި ވަނީ 5600 ރުފިޔާ ކަމަށް އޭރުގެ ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެފައިވާތީ އެ އަގާއި ގުޅިގެން ސުވާލުކުރުމުން ސުހައިލް ވިދާޅުވީ މިހާރު ގެނައި ބަދަލާއެކު ވެސް އެ އަދަދަށް ކުލި ތިރި ނުކުރެވޭނެ ކަމަށެވެ. އެގޮތަށް އެކަންކޮށްފިނަމަ ދެކޮޅު ނުޖެހޭނެ ކަމަށާއި ފްލެޓް އަޅަން ނެގި ލޯނު ވެސް ނުދެއްކޭނެ ކަމަށް ވިދާޅުވި އެވެ.
ހުޅުމާލޭގައި ދެވަނަ ފިޔަވަހީގައި ޗައިނާގެ ސްޓޭޓް އިންޖީނިއަރިން އެންޑް ކޮންސްޓްރަކްޝަން ކޮމްޕެނީއާ ހަވާލުކުރި އެ މަޝްރޫއުގައި އިމާރާތްކުރަމުން ދަނީ 25 ބުރީގެ 16 ޓަވަރެވެ. އެއިން ކޮންމެ ފްލެޓެއްގެ ބޮޑު މިނަކީ 550 އަކަ ފޫޓެވެ.