މިއަދު މަޖިލީހުގައި އަންނަނީ މައްޗަންގޮޅި ދެކުނު ދާއިރާ ގެ މެންބަރު އަހްމަދު ހައިތަމް، ދިވެހިރާއްޖޭގައި ކުޑަކުދިންނަށް ކުރަމުންދާ އަނިޔާ ހުއްޓާލުމުގެ ގޮތުން ދައުލަތުން ކުޑަކުދިންނާއި، ކުޑަކުދިންގެ ރައްކާތެރިކަމަށް މިހާރަށްވުރެ ބޮޑަށް ސަމާލުކަންދިނުމަށް އެދި ގޮވާލައި ހުށަހަޅާފައިވާ ޤަރާރަށް ބަހުސް ކުރަމުންނެވެ. އެގޮތުން އެކި މެމްބަރުން ވަނީ ރާއްޖޭގައި ކުޑަކުދިންނާއި އަންހެނުންނަށް ކުރިމަތިވެފައިވާ ޖިންސީ ގޯނާއާއި ފުރައްސާރައާއި ގުޅޭގޮތުން ގިނަ ވާހަކަތަކެއް ދައްކަވާފައެވެ.
އެ ވާހަކަތަކާއި ގުޅިގެން މަޖިލީހުގައި ވާހަކަ ދައްކަވަމުން ރައީސް ނަޝީދު ވިދާޅުވީ ހުރިހާ ފަރާތްތަކެއް ދެގޮތެއް ނުވެ އެއްވިސްނުމުގައި ތިބެވިއްޖެ ކަމަށް ވާނަމަ ކުރީގެ ޖީލަށް ދިމާވި ކަންކަން މިހާރުގެ ޖީލަށް ދިމާނުވެ ވާނެގޮތެއް ހޯދައިދިނުމަކީ މެމްބަރުން މަޖިލީހަށް އިންތިހާބު ވެފައިވާ މައިގަނޑު ބޮޑު ސަބަބު ކަމަށެވެ.
މީގެ އިތުރުން ރައީސް ނަޝީދު ވިދާޅުވީ ރައްޔިތުން މި މަޖިލިސް އިންތިހާބުކުރީ ރާއްޖޭގައި އުނދަގޫ މައްސަލަތައް އޮތުމުން އެކަންކަމަށް ހައްލުހޯދުމަށް ކަމަށެވެ. އަދި މެމްބަރުން ސާބިތުކަމާއި އެކު އެ މަސައްކަތް ކުރަމުން ގެންދަވާކަމަށް ރައީސް ނަޝީދު ވިދާޅުވި އެވެ.