އެ އާއިލާގެ މީހަކު މިރޭ ސީއެންއެމްއަށް ބުނި ގޮތުގައި މާލެއިން ރަށުގައި ކަރަންޓީނުވުމަށް ދިޔައީ ދެމަފިރިން ދިޔައީ އެމީހުންގެ އަންހެން އަދި ފިރިހެން ދަރިފުޅާއެކު އެވެ. ނަމަވެސް ދެމަފިރިންނާއި އެމީހުންގެ އަންހެން ދަރިފުޅު ބައްޔަށް ނެގެޓިވްކަމަށް މީގެ ހަވަރަކަށް ދުވަސް ކުރިން އެންގި ނަމަވެސް ފިރިހެން ދަރިފުޅުގެ ނަތީޖާ އޭރު ނުލިބެ އެވެ. 

ފަހުން އާއިލާއިން ގުޅާއި އެކަމުގެ ކަންބޮޑުވުން ފާޅުކުރުމުން، ވަނީ އެ ފިރިހެން ކުއްޖާ ވެސް ބައްޔަށް ނެގެޓިވްކަން މީގެ ހަތަރު ވަރަކަށް ދުވަސްކުރިން އަންގާފަ އެވެ. 

އެކަމަކު މިއަދު ފިރިހެން ކުއްޖާގެ އިތުރު ސާމްޕަލެއް ނަގައި، އެކުއްޖާ ބައްޔަށް ޕޮޒިޓިވްވުމާއި އެކު ކަރަންޓީނުކުރި އެ ތިން މީހުންގެ ސާމްޕަލް ވެސް ނެގި ކަމަށާއި އެއިން ދެމަފިރިން ވެސް ބައްޔަށް ޕޮޒިޓިވްވެފައިވާކަން އެނގިގެންދިޔަ ކަމަށް އާއިލާއިން ބުނެ އެވެ. 

އާއިލާއިން އިތުރަށް ބުނި ގޮތުގައި، ގޭގައި ދަމާފައި ހުރި ޓޭޕްވެސް ނައްޓާލާއި، އެމީހުން ބޭރަށް ދިއުމުގެ ހުއްދަ ސިއްހީ މަރުކަޒުން ދިނުމުން، ކަރަންޓީންވި މީހުން ވެސް ވަނީ ބޭރަށް ނިކުމެފަ އެވެ. އެގޮތުން ފިރިހެން، ރަށުގައި ބައްދަލުނުވާ މީހަކު ނުހުންނާނެ ކަމަށް އެމީހުން ބުނެ އެވެ. އަދި ކުޑަ ފިރިހެން ކުއްޖާ އިއްޔެ ހުކުރު ނަމާދަށް ވެސް ދިޔަ ކަމަށާއި މިއަދު ފަތިސް ނަމާދަށް ވެސް ދިޔަ ކަމަށް އާއިލާއިން ބުނެ އެވެ. 

އޭގެ އިތުރުން އެ ގެއަކީ ވިޔަފާރިއެއް ވެސް ހިންގާ ގެެއެއްކަމުން ފިހާރައިން ވެސް އެތައް ބަޔަކާއި ދިމާވެފައިވާ ކަމަށް އާއިލާއިން ބުނެ އެވެ. އަދި އޮޅިގެން އެފަދަ އެންގުމެއް އެންގުމުން އާއިލާއިން ވަރަށް ބޮޑަށް ނުރުހުން ފާޅުކޮށްފައިވާއިރު، އެމީހުން ވަނީ އެގޭގައި ހައި ރިސްކް މީހުން ވެސް އުޅޭ ކަމަށް ބުނެފަ އެވެ.

އާއިލާއިން ވަނީ ނަތީޖާ ނުލިބެނީސް އެމީހުން ބޭރަށް ނިކުތް މޭރުމުން ބައެއް ނޫސްތަކުގައި ރިޕޯޓްކޮށްފައިވާތީ އެކަމުގެ ކަންބޮޑުވުން ވެސް ފާޅުކޮށްފަ އެވެ. 

އެ ހުރިހާ ކަމެއް ވެސްވީ ރަށު ސިއްހީ މަރުކަޒުގެ އިހުމާލުން ކަމަށް އާއިލާއިން ތުހުމަތުކުރެ އެވެ. އެކަމަކު އެކަމާއި ގުޅިގެން ސިއްހީ މަރުކަޒުގެ ސީނިއާ އެޑްމިނިސްޓްރޭޓާ އާމިރު އަހުމަދު ވިދާޅުވީ، އެމީހުންނަށް ހުރިހާ އެންގުމެއް ވެސް އެންގީ ކަމާއި ބެހޭ ފަރާތްތަކުން އެންގި ގޮތަށް ކަމަށެވެ.

އާމިރު އިތުރަށް ވިދާޅުވީ، ދުވާފަރު ސިއްހީ މަރުކަޒުން ސާމްޕަލް ނެގުމަށް ފަހު އެތަކެތި މާލެ ފޮނުވީ ރ. އަތޮޅު ރީޖަނަލް ހޮސްޕިޓަލުގެ ބެލުމުގެ ދަށުން ކަމަށެވެ.

އާމިރު އިތުރަށް ވިދާޅުވީ ފިރިހެން ކުއްޖާގެ އިތުރު ސާމްޕަލެއް ނަގަން ޖެހޭކަން އެންގީ އެކުއްޖާ ނެގެޓިވްވި ކަމަށް އެންގިތާ 24 ގަޑިއިރު ފަހުން ކަމަށެވެ. އެގޮތުން މިއަދު އުނގޫފާރުން އައި ޓީމެއް އެކުއްޖާގެ ސާމްޕަލް ނަގާއި، އެރަށުން ޓެސްޓްކުރުމުން ކުއްޖާ ޕޮޒިޓިވްވިކަން އެނގިގެންދިޔަ ކަމަށް އާމިރު ވިދާޅުވި އެވެ.

އެކުއްޖާ ޕޮޒިޓިވްވުމާއެކު އެކުއްޖާއާއެކު ކަރަންޓީނުގައި ތިބި މަންމަ އާއި ބައްޕަގެ އިތުރުން އަންހެން ކުއްޖާގެ ސާމްޕަލް ނެގި ކަމަށާއި އެގޮތުން އަންހެން ކުއްޖާ ފިޔަވައި، މަންމަ އާއި ބައްޕަ ވެސް ޕޮޒިޓިވްކަން އެނގުނީ އެ ހިސާބުން ކަމަށް އާމިރު ވިދާޅުވި އެވެ. 

އާމިރު ވިދާޅުވީ އެތަނުން އާއިލާއަށް ހިއްސާކުރި މައުލޫމާތުތަކަކީ ކަމާއި ބެހޭ އިދާރާތަކުން ސިއްހީ މަރުކަޒަށް ހިއްސާކުރި މައުލޫމާތު ކަމަށެވެ.

މިކަމާއި ގުޅިގެން ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) ގެ ބަހެއް އަދި ނުލިބެ އެވެ.