މޯލްޑިވިއަން އިން މިއަދު ކުރި ޓްވީޓެއްގައި ބުނީ މޯލްޑިވިއަންގެ ފްލައިޓެއްގައި އިތުރު 200 ބަންގްލަދޭޝް މީހަކު މިއަދު ފުރާފައިވާ ކަމަށެވެ. އެގޮތުން އެ ފްލައިޓް ދާނީ ބަންގްލަދޭޝްގެ ވެރިރަށް ޑާކާއަށް ކަމަށް ވެސް މޯލްޑިވިއަނުން ބުނެ އެވެ. 

މޯލްޑިވިއަނުން ބުނި ގޮތުގައި މިއީ ބަންގްލަދޭޝް މީހުން ގައުމަށް ގެންދިއުމަށް އެ އެއާލައިނުން ކުރާ 20 ވަނަ ދަތުރެވެ. 

ސަރުކާރާއި މޯލްޑިވިއަން ގުޅިގެން ރާއްޖޭގައި އުޅޭ ބަންގްލަދޭޝް މީހުން އަނބުރާ ގައުމަށް ފޮނުވުމުގެ މަސައްކަތް ކުރަމުން އަންނައިރު މިމަހުގެ 11 ވަނަ ދުވަހު ވެސް މޯލްޑިވިއަންގެ ފްލައިޓެއްގައި އެގައުމުގެ 200 މީހަކު ގައުމަށް ފޮނުވާލާފައިވެ އެވެ. 

އެގޮތުން މިހާރު ކުރިއަށްދާ އޮޕަރޭޝަނަކީ ރާއްޖޭގައި ގަވާއިދާ ހިލާފަށް އުޅޭ ބަންގްލަދޭޝްގެ މީހުން ފޮނުވާލުމަށް ކުރިއަށް ގެންދާ އޮޕަރޭޝަނެކެވެ. 

ކުރިއަށް އޮތް ދުވަސްތަކުގައި 5،000 އެއްހާ ބަންގަލަދޭޝް މީހުން ފޮނުވާލެވޭނެ އިންތިޒާމް ހަމަޖެއްސުމުގެ މަސައްކަތްތައް ސަރުކާރުން ކުރަމުންދާ އިރު، މިހާރު 3،000 އަށް ވުރެ ގިނަ ބަންގްލަދޭޝް ރައްޔިތުން އަނބުރާ އެ ގައުމަށް ވަނީ ފޮނުވާލާފަ އެވެ.  

މޯލްޑިއަންގެ ފްލައިޓުތަކުގެ އިތުރުން، ރާއްޖެއަށް އައި އެގައުމުގެ އަސްކަރިއްޔާގެ ފްލައިޓެއްގައި ވެސް މީހުންވަނީ ގެންގޮސްފަ އެވެ.