ވޭމަންޑޫ އާއި ތިމަރަފުށީގެ ބައެއް މަޝްރޫއުތަކާ ގުޅޭ ގޮތުން ތިމަރަފުށި ދާއިރާގެ މެންބަރު އަބްދުﷲ ރިޔާޒު ކުރައްވާ ސުވާލުތަކަށް ޖަވާބު ދެއްވުމަށް މަޖިލީހަށް ވަޑައިގެން މިނިސްޓަރު މަހްލޫފް ވިދާޅުވީ މަޖިލީހުގެ އިޖްތިމާއީ ކޮމިޓީން ދިރާސާ ކުރަމުންދާ މައްސަލަ ނިމެންދެން އެފްއޭއެމުގެ އިންތިހާބު ފަސްކޮށްދޭން ކޮމެޓީން އެދުނު ގޮތަށް އެކަން ކުރުމަށް އެފްއޭއެމުގައި މިނިސްޓްރީން އެދުނު ކަމަށާއި އެހެން ނަމަވެސް އިންތިހާބު ހުއްޓުވާލުމަކީ ގާނޫނީ ގޮތުން މިނިސްޓްރީއަށް ކުރެވޭނެ ކަމެއް ނޫން ކަމަށެވެ.
މިނިސްޓަރު ވިދާޅުވީ އެކަން ހުއްޓާލަން އެންގި ނަމަ އެއީ ކަނޑައެޅިގެން ގާނޫނާ ހިލާފު ކަމެއް ކަމަށާއި ވަޒީރަކަށް ހުންނަ މީހަކަށް އެއްވެސް ގައުމެއްގެ ކުޅިވަރު އެސޯސިއޭޝަނެއްގެ އިންތިހާބަށް ބާރު ފޯރުވާ ހެދުމުގެ ހައިސިއްޔަތެއް ނޯންނާނެ ކަމަށެވެ.
މިނިސްޓަރު މަހްލޫފް ވިދާޅުވީ ހަތަރު މަސް ކުރިން އެފްއޭއެމްގެ އިންތިހާބަށް އިއުލާނު ކުރިކަމަށާއި ނަމަވެސް އެއްވެސް ބޭފުޅަކު އެފްއޭއެމުގެ އިންތިހާބަށް ވާދަ ކުރައްވާފައިނުވާ ކަމަށެވެ. އަދި ހަތަރު މަސް ފަހުން އިންތިހާބު ބާއްވަން އުޅުމުން މިނިސްޓްރީން ފުލުހުން ފޮނުވައި ކުޅިވަރު އެސޯސިއޭޝަންގެ އިންތިހާބު ހުއްޓުވަން އުޅުމަކީ ވަރަށް ހަޑި ކަމެއް ކަމަށް މަހުލޫފު ވިދާޅުވި އެވެ.
މިނިސްޓަރު މަހްލޫފު މިއަދުގެ ރައްޔިތުންގެ މަޖިލީހުގެ ޖަލްސާއަށް ހާޒިރުވެވަޑައިގަތީ ވޭމަންޑޫއާއި ތިމަރަފުށީގެ ބައެއް މަޝްރޫއުތަކާ ގުޅޭ ގޮތުން އެ ދެ ރަށް ހިމެނޭ ތިމަރަފުށި ދާއިރާގެ މެންބަރު އަބްދުﷲ ރިޔާޒު ހުށަހެޅުއްވި ދެ ސުވާލަށް ޖަވާބު ދެއްވުމަށެވެ.
