އެޑިއުކޭޝަން މިނިސްޓްރީން މިއަދު ކުރި ޓްވީޓެއްގައި ވަނީ ސްކޫލްތަކުގެ ކިޔެވުން ފެށުން އޯގަސްޓް ނުވަތަ ސެޕްޓެމްބަރު މަހަށް ބަދަލު ކުރުމާއި ގުޅޭގޮތުން ހިޔާލު ހޯދުމުގެ ފޯމު ވީހާވެސް ގިނަ ދަރިވަރުންނާއި ބެލެނިވެރިން ފުރަމަށް އެދިފަ އެވެ.
އެ ފޯމު ވެސް ޓްވީޓާ މެދުވެރިކޮށް ހިއްސާކޮށްފައިވާއިރު ވީހާވެސް ގިނަ ފަރާތްތަކަށް ހިއްސާކޮށް އެ ފޯމް ފުރުއްވުމަށް ހިތްވަރު ދިނުމަށް ވެސް އެޑިޔުކޭޝަން މިނިސްޓްރީން ވަނީ އެދިފަ އެވެ.
މި އަހަރުގެ އޮކްޓޯބަރު/ނޮވެމްބަރު ގައި ބޭއްވުމަށް ކުރިން ތާވަލުކުރި ސާނަވީ ނިންމާ އިމްތިހާނުތައް މިހާރު އަންނަ އަހަރަށް ފަސްކޮށްފައިވާއިރު އަރަބިއްޔާ ސްކޫލުގެ ދަރިވަރުން ހަދާ ޝަހާދާ ސާނަވިއްޔާ އިމްތިހާންތައް ވެސް އޮންނަނީ އެމުއްދަތުގެ ތެރޭގައި ކަމަށް މިނިސްޓްރީން ބުނެ އެވެ.
އެ ބަދަލުގެ ސަބަބުން ސްކޫލްތަކަށް ދިމާވާނެ ޖާގައިގެ ދަތިކަމުންނާއި، މުދައްރިސުންނާއި އެހެނިހެން ވަސީލަތްތަކުގެ ދަތިކަމުން އަރައިގަތުމަށް އަންނަ އަހަރުގެ ދިރާސީ އަހަރު، އަހަރުގެ މެދުތެރޭ ފެށުމަށް ސޯޝަލް ކައުންސިލްގެ ލަފަޔާއެކު ނިންމާފައިވާކަން މީގެ ކުރިން އެޑިޔުކޭޝަން މިނިސްޓްރީން ވަނީ ބުނެފަ އެވެ.