ސީޕީ ހަމީދު މިފަދައިން ވިދާޅުވެފައިވަނީ ރާއްޖެޓީވީގެ ޕްރޮގްރާމެއްގައި ވާހަކަ ދައްކަވަމުންނެވެ.
މަރުތައް ތަހުގީގުކުރާ ރިޔާސީ ކޮމިޝަނުން އެކުލަވާލި ޑްރާފްޓް ރިޕޯޓެއް މަޖިލީހަށް ހިއްސާކުރުމުން އެ ރިޕޯޓް މަޖިލީހުން އާއްމު ކުރިއެވެ. އެކަމާ ގުޅޭގޮތުން ވާހަކަ ދައްކަވަމުން ސީޕީ ހަމީދު ވިދާޅުވީ، ތަހުގީގުތަކުގެ ފުރިހަމަ ރިޕޯޓު ނުނެރެވި އޮއްވާ ތަހުގީގުގެ ބައިބައި ރިޕޯޓް ޑްރާފްޓް ފޯމުގައި މަޖިލީހުން އާއްމު ކުރުމުން އެކަމާ "ޑިސަޕޮއިންޓް" ވިކަމަށެވެ.
އެ ތަހުގީގުތައް ކުރިއަށް ގެންދަންޖެހޭނީ ގެއްލުވާލާފައިވާ އަދި މަރާލާފައިވާ ފަރާތްތަކުގެ އާއިލާތަކަށް އިންސާފު ހޯދައިދިނުމަށް ކަމަށާއި، ވަކި ކަހަލަ ފައިދާއެއް ނަގަން ނޫންކަމަށް ސީޕީ ވިދާޅުވި އެވެ. އަދި ވިދާޅުވީ އެ ޑްރާފްޓް ރިޕޯޓް އާއްމު ކުރުމުން އިންސާފު ހޯދައި ދިނުމަށްޓަކައި ހުރަސްތަކެއް ކުރިމަތިވި ކަމަށެވެ.
ސީޕީ ހަމީދު ވިދާޅުވީ މަރުތަކަށް އިންސާފު ނުލިބި ލަސްވަނީ ފުލުހުންގެ ސަބަބުން ކަމަށް ބައެއް ފަރާތްތަކުން ބުނާ ވާހަކަ ގަބޫލުނުކުރައްވާނެ ކަމަށެވެ.
މަޖިލީހުގެ ބައެއް މެމްބަރުންނަށް ވަކި ވަކި ފުލުހުން ފާރަލާ ކަމަށާއި، ރެއިޑް ކުރުމަށް ރާވާކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވި ވާހަކަތަކާއި ގުޅޭގޮތުން ވެސް ސީޕީ ހަމީދް ވާހަކަ ދައްކަވާފައިވެއެވެ. އެގޮތުން ވިދާޅުވީ، އެކަމާއި ގުޅިގެން މަޖިލީހުގެ ރައީސްއާއި ވާހަކަ ދެއްކެވި ކަމަށެވެ. އަދި ފުލުހުންގެ ފަރާތުން އެފަދަ އޮޕަރޭޝަނަލް އެކްޓިވިޓީއެއް ނުހިންގާކަން ވަރަށް ސާފުކޮށް ބުނެދީފައިވާނެ ކަމަށްވެސް ސީޕީ ވިދާޅުވި އެވެ.