އުމުރުން 67 އަހަރުގެ އެމީހާ މަރުވެފައި ވަނީ މިއަދު 12:12 ގައި ކަމަށް އެޗްޕީއޭ އިން ބުނެ އެވެ. އަދި އެމީހާއަކީ އައިޖީއެމްއެޗުގެ އީއާރުގައި ފަރުވާދެމުން އައި މީހެއް ކަމަށާއި އެމީހާ ހޮސްޕިޓަލަށް ގެންދިޔައީ އިއްޔެ ކަމަށް ވެސް އެޗްޕީއޭ އިން ބުނެ އެވެ.
އެމީހާގެ މަރާއެކު އާއިލާއިން އަންނަނީ އެޗްޕީއޭއަށް ވަރަށް ބޮޑަށް ފާޑުކިޔުންތައް އަމާޒުކުރަމުންނެވެ. އެމީހާގެ އާއިލާގެ މެމްބަރަކު ކުރި ޓްވީޓެއްގައި ބުނީ އެޗްޕީއޭގެ ފަރާތުން ބޮޑުބޭބެ އައިސޮލޭޝަނަށް ގެންދިއުމަށް އޭނާގެ ދަރިފުޅަށް ގުޅާފައި ވަނީ ޖަނާޒާގެ ކަންކަން ކުރިއަށް ދަނިކޮށް ކަމަށެވެ.
އަދި މުއާމަލާތް ކުރުމުގައި އެޗްޕީއޭ އިން ފެއިލްވުމުން އާންމުން އެމީހުންނަށް ކިޔަމަންތެރިވާނެ ކަމަށް އުއްމީދުކުރަނީ ކީއްވެތޯ އޭނާ ވަނީ ސުވާލު އުފައްދާފަ އެވެ.
އެ އާއިލާގެ ކަންބޮޑުވުންތަކަށް ބަލާއިރު ޕޮޒިޓިވްވި މީހުން ކަރަންޓީން ފެސިލިޓީއަކަށް ނުގެންދިއުމާއި ގޭގައި މޮނިޓަރިންގެ ނޯޓިސް ވެސް ނުހިއްޕާ ކަމަށް ވެ އެވެ. އަދި ޑައިރެކްޓް ކޮންޓެކްޓްވި ފަރާތްތައް ވެސް ޓެސްޓް ނުކުރާކަމަށް ވަނީ ބުނެފަ އެވެ.
އެގޮތުން އާއިލާގެ އިތުރު މެމްބަރަކު ކުރި ޓްވީޓެއްގައި ވަނީ އެޗްޕީއޭ އިން މަޑުކޮށްގެން ތިބީ މީހަކު މަރުވަންދެން ކަމަށް ބެލެވޭ ކަމަށާއި އެގޮތުން ޕޮޒިޓިވްވި މީހުން ބަލާއި މިއަދު އަންނާނެ ކަމަށާއި ނޯޓިސް ވެސް މިއަދު ހަރުކުރާނެ ކަމަށް ބުނެފައިވާ ކަމަށް ވަނީ ބުނެފަ އެވެ.
އެ ޓްވީޓުތަކާއެކު ގިނަ ބަޔަކު ވަނީ އެޗްޕީއޭއަށް ފާޑުކިޔުން އަމާޒުވެފަ އެވެ. މިފަހަކަށް އައިސް މީހުން ކަރަންޓީން ފެސިލިޓީޓަކަށް ގެންދިއުމުގައި ބޮޑެތި ލަސްތަކެއް ދިމާވެފައިވާއިރު ހައި ރިސްކް މީހުން ވެސް ޓެސްޓް ނުކުރާ ކަމަށް ބުނެ އެވެ.
އެނގިފައިވާ ގޮތުގައި މީގެ ފަސް ދުވަސް ކުރިން ކޮވިޑް ޖެހުނު ބައެއް މީހުން އަދިވެސް ގޭގައި އެބަ ތިއްބެވެ. އަދި ހައި ރިސްކް މީހުންނާއިއެކު މާލެ ފަދަ ކުޑަ ތަންކޮޅެއްގެ ތެރޭގައި ދިރިއުޅެން ޖެހިފައިވާތީ އެމީހުންނަށް ވެސް ބަލި ޖެހިދާނެ ކަމުގެ ބިރު ވަނީ ހީވެފައި ކަމަށް ބުނެ އެވެ.