ކޮވިޑާއި ގުޅިގެން ކުރި ހަރަދުތަކުގެ އޮޑިޓް ރިޕޯޓުތަކާއި ގުޅިގެން ވިލިމާލޭ ދާއިރާގެ މެމްބަރު އަހުމަދު އުޝާމު ހުށަހެޅުއްވި ކުއްލި މައްސަލައަށް ބަހުސް ކުރައްވަމުން އާޒިމް ވިދާޅުވީ ކޯލިޝަނުގެ ސަރުކާރެއް އޮތްއިރު މި ސަރުކާރުގެ 60 އިންސައްތަ ވަޒީރުން މަސައްކަތް ކުރަމުންގެންދަނީ އެމްޑީޕީގެ ނަމަށް ހުތުރުވާ ގޮތަށް މަސައްކަތް ކުރުމަށް ކަމަށާއި އަދި އެޕާޓީގެ ބޮލުގައި އިލްޒާމުތައް ވެސް އަޅުވަމުން އަންނަ ކަމަށެވެ.
އާޒިމް ވިދާޅުވީ އެމްޑީޕީއަށް ރައްޔިތުން 65 ގޮނޑި ހަވާލުކުރިއިރު އެކަން މަޖިލީހުގެ ތެރެއިން ދައްކަމުން އަންނަ ކަމަށެވެ. އެކަމަކު މީގެ ކުރިން މަޖިލީހުގެ ތެރެއިން ފެނިގެންދިޔައީ އޮޑިޓް ރިޕޯޓެއް ނެރުމާއެކު އެއީ ވަޒީރަކާއި ނުވަތަ ރައީސްއާ ދެކޮޅަށް އޮތް އެއްޗެއް ކަމަށްވާނަމަ އެ އޮޑިޓާ ޖެނަރަލެއްގެ އިތުބާރު ނެތް ކަމުގެ ވޯޓު ނަގާ މަންޒަރު ކަމަށެވެ.
އޭގެ އިތުރުން އާޒިމް ވިދާޅުވީ، ކޮރަޕްޝަނުގެ މައްސަލަތަކުގެ ވާހަކަ އެނގޭނަމަ އެކަން ތިލަކުރަން ޖެހޭ ކަމަށާއި އެގޮތުން އެމްޑީޕީން ވެސް އޮތީ ރާއްޖޭގައި ހިނގަމުންދާ ވައްކަމާއި ކޮރަޕްޝަނުގެ މައްސަލަތައް ފޮހެލުމަށް ނިކުމެ ކަމަށެވެ.
އާޒިމް ވިދާޅުވީ، އެފަދަ ވާހަކަތައް ދައްކަން ފެށުމާއެކު ބައެއް ފަރާތްތަކަށް ހީވަނީ އެކަމަކީ ސަރުކާރު ވައްޓާލަން ކުރާ ކަމެއް ކަމަށާއި ނޫނީ އެކަމަކީ ރައީސް އިބްރާހީމް މުހައްމަދު ސޯލިހާއި އިދިކޮޅަށް ހިންގާ ކަންތައްތަކެެއް ކަމަށެވެ.
އެކަމަކު އެ މަސައްކަތަކީ ރައީސް ސޯލިހު ސަލާމަތްކުރުމުގެ މަސައްކަތް ކަމަށާއި އަދި ކެބިނެޓުގައި ތިބި ވައްކަންކުރާ ވަޒީރުން އެއް ކައިރިކުރުން ކަމަށެވެ. އަދި އެ މަސައްކަތް ހުއްޓާނުލާ ކުރިއަށް ގެންދާނެ ކަމަށް ވަނީ ވިދާޅުވެފަ އެވެ.
