ޕީޕީއެމަށް މީހުން ސޮއިކުރުމަށް ބޭއްވި ރަސްމިއްޔާތެއްގައި ރޭ އަބްދުއްރަހީމް ވިދާޅުވީ، އިދިކޮޅު ކޯލިޝަނުން ސަރުކާރާއި ހަވާލުވެ އެންމެ އިސް މަސްއޫލިއްޔަތަކަށް ވާނީ ދިވެހި ދައުލަތުގެ ހަޒާނާ "ކައި ހުސްކުރި" މީހުން ގާނޫނުގެ ކުރިމައްޗަށް ގެނައުން ކަމަށެވެ. އަދި އެންމެ ފުރަތަމަ ހާޒިރުކުރާނެ ފަރާތަކަށް ވާނީ ރައީސް އިބްރާހީމް މުހައްމަދު ސޯލިހު ކަމަށް ވެސް އަބްދުއްރަހީމް ވިދާޅުވި އެވެ.
މިއަދު ރާއްޖޭގެ ވެރިކަމުގައި އޮތީ އެއްވެސް ކުލުނެތް ގައުމަށް ކުރާ ބައެއް ނޫން ކަމަށާއި އެގޮތުން ބަލަބަލާ ތިއްބާ ވަނީ ދިވެހި ދައުލަތުގެ ހަޒާނާ ކައި ހުސްކޮށްފައިވާ ކަމަށް ވެސް އަބްދުއްރަހީމް ވިދާޅުވި އެވެ.
ބަލާލި ކޮންމެ ދިމާލަކުން މިއަދު ފެންނަނީ ވައްކަން ކުރާ މަންޒަރުކަން ފާހަގަކޮށް އަބްދުއްރަހީމް ވިދާޅުވީ، އޮޑިޓެއް ކުރިޔަސް ފެނިގެންދަނީ ވައްކަން ކަމަށެވެ. އެކަމަކު ވައްކަމުގެ ޒިންމާ ނަގާނެ ބަޔަކު ނެތް ކަމަށާއި މިއަދު ފެނިގެންދަނީ ކާނެ ވަރަކަށް ކައިގެން ޒިންމާއިން އެކަހެރިވާ މަންޒަރު ކަމަށެވެ.
ގައުމު މިފަދަ ހާލަތަކަށް ދިއުމުން ވަގުން ހިފަން ނިކުންނަންޖެހޭ ކަމަށާއި އެގޮތުން މިއަދު ދިވެހި ރައްޔިތުންގެ ކޮނޑުގައި އެޅިފައި އޮތް އެންމެ ބޮޑު މަސްއޫލިއްޔަތަކީ ވަގުން ހިފުން ކަމަށް ވިދާޅުވި އެވެ.
އަބްދުއްރަހީމް ވިދާޅުވީ ރާއްޖޭގެ ރައީސުލްޖުމްހޫރިއްޔާގެ މަގާމުން ފެށިގެން ދަށަށް ތިބި ހުރިހާ މީހުންނަކީ ވެސް ވަގުން ކަމަށާއި ރައީސަށް ވެސް ހެލްތު މިނިސްޓަރު ނުވަތަ ޓޫރިޒަމް މިނިސްޓަރުގެ ބޮލުގައި ކަންކަން އެޅުވުމަށް ފަހު ރެކިވަޑައިނުގަނެވޭނެ ކަމަށެވެ.