ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންތަކާއި ހިލާފަށް މާލޭގައި ހަރަކާތް ބޭއްވި މައްސަލައާ ގުޅިގެން މިއަދު ރައީސް ވަހީދު ފުލުހަށް ހާޒިރުކޮށްފައިވާއިރު އެ ސަރަހައްދުގައި ނޫސްވެރިންނާއި ބައްދަލުކުރައްވާ ރައީސް ވަހީދު ވަނީ އެމަނިކުފާނު، މި ރާއްޖޭގައި އެންމެ ފުރަތަމަ މާސްކް އެޅުއްވި ބޭފުޅުންގެ ތެރޭގައި ހިމެނިވަޑައިގަންނަވާނެ ކަމަށް ވިދާޅުވެފަ އެވެ.
އެގޮތުން ދުނިޔޭގެ ސިއްހަތު ޖަމިއްޔާ އާއި އެޗްޕީއޭގެ ފަރާތުން ވެސް މާސްކް އެޅުން މުހިއްމު ނޫންކަމަށް ބުނަމުން އައި ދަނޑިވަޅުގައި އެމަނިކުފާނު ގެންދެވީ މާސްކް އަޅުއްވަމުން ކަމަށް ވިދާޅުވި އެވެ.
ރައީސް ވަހީދު ވިދާޅުވި ގޮތުގައި ސައިކަލު ބުރު އޮތް ދުވަހު، ވެސް އެމަނިކުފާނު އުޅުއްވީ މާސްކް އަޅުއްވައިގެންނެވެ. އަދި ވާހަކަފުޅު ފަސޭހަކަމާއެކު ދެއްކެވުމުގެ ގޮތުން މާސްކް ނަގާއި ވާހަކަފުޅު ދެއްކެވިއިރު ތިން ފޫޓު ގާތުގައި އެއްވެސް މީހަކު ނެތެވެ. އަދި އެމަނިކުފާނު ހުންނެވީ ވެސް އިމާރާތުގެ ތެރޭގަ އެވެ.
އޭގެ އިތުރުން ރައީސް ވަހީދު ވަނީ ކުރީގެ ރައީސް މުހައްމަދު ނަޝީދަށް ވެސް ފާޑުވިދާޅުވެފަ އެވެ. އެގޮތުން އެމަނިކުފާނު ފޮތެއް ނެރުއްވިއިރު މާސްކް ނާޅާއި އުޅުއްވި ކަމާއި އިނގިރޭސިވިލާތަށް ފުރާވަޑައިގަތުމުގެ ކުރިން އެއާޕޯޓުގައި ނަންގަވާފައިވާ ފޮޓޯތަކުން ވެސް މާސްކް ނާޅާއި މަންޒަރު ފެނިވަޑައިގަތް ކަމަށް ވިދާޅުވި އެވެ. އެކަމަކު، ނަޝީދު ފުލުހަށް ހާޒިރު ނުކުރައްވާ، އެމަނިކުފާނު ހާޒިރު ކުރެއްވުމުން އެކަމުގެ ޝަކުވާ ކުރެއްވި އެވެ. އަދި ރައީސް ވަހީދު ވިދާޅުވީ ފުލުހަށް ހާޒިރުކުރީ ސަރުކާރާއި އިދިކޮޅުގައި މިވަގުތު ހުންނެވުމުން ކަމަށެވެ.
ހުކުރު ދުވަހު ބޭއްވި ހަރަކާތުގައި މާސްކް ނާޅުއްވާ ރައީސް ވަހީދު، ވާހަކަފުޅު ދެއްކެވެމުން ގިނަ ބަޔަކު ވަނީ ސޯޝަލް މީޑިއާގައި ފާޑުކިޔުންތައް އަމާޒުކޮށްފަ އެވެ.