މީގެ އެންމެ ދެ ހަފުތާއެއްހާ ދުވަސް ކުރިން މުޅި ދުނިޔޭގެ މީޑިއާގެ ސަމާލުކަމަށް އައީ، މެސީ ބާސެލޯނާ ދޫކޮށްލަން ނިންމައި އެކަން ކްލަބަށް އެންގި ހަބަރެވެ. އޮގަސްޓް ފަހު ހަފުތާ ތެރޭ މެސީގެ މި ނިންމުމާއި އެކު އޭނާ ހުށަހެޅީވެސް ހިލޭ ޓްރާންސްފައެއްގައި ކްލަބު ބަދަލު ކުރާށެވެ. އެހެންނަމަވެސް ބާސާއަކަށް އެ ގޮތެއް ކަމަކު ނުދިޔައެވެ.
ގޯލްޑޮޓްކޮމްއާ ވާހަކަ ދައްކަމުން މެސީ ބުނީ އަންނަ ސީޒަންގެ ނިޔަލަށް ބާސެލޯނާގައި މަޑު ކުރާނެ ކަމަށެވެ. މި ގޮތަށް ނިންމި މައިގަނޑު ސަބަބެއް ކަމަށް މެސީ ބުނީ ކޮންޓްރެކްޓްގެ މާއްދާއަކާ މެދު އުފެދުނު ނުތަނަވަސްކަމެއްގައި ބާސެލޯނާ ގޮވައިގެން ކޯޓަށް ދާން ބޭނުން ނުވުމުވެ.
އައު ސީޒަނަށް ބާސެލޯނާއިން މިހާރު ޕްރެކްޓިސް ފަށާފައިވާއިރު، މެސީ އަދި ޕްރެކްޓިހުގައި ބައިވެރިނުވެއެވެ. އެހެންނަމަވެސް ހުކުރު ދުވަހުގެ ރޭ ގޯލްޑޮޓްކޮމްއިން އާއްމު ކުރި މެސީގެ އިންޓަވިޔުއާއި އެކު އިސާހިތަކު މެސީ ޕްރެކްޓިހަށް ނުކުންނާނެ ކަމަށް ރިޕޯޓްތައް ބުނެއެވެ.