ކޮވިޑާއި ގުޅިގެން މިއަހަރުގެ މާރިޗު މަހު، އޭއެފްސީ ކަޕުގެ މެޗުތައްވަނީ މެދު ކަނޑާލާފައެވެ. އޭނގެ ފަހުން، މުބާރާތުގެ ފޯމެޓަށް ބަދަލު ގެނެސް، ސިންގަލް ވެނިއުއެއްގައި ކުރިއަށް ގެންދަން އޭއެފްސީންވަނީ ނިންމާފައެވެ. އެހެންނަމަވެސް ގްރޫޕް ސްޓޭޖުގެ މެޗުތައް ހޯސްޓް ކުރުމަށް ގިނަ ގައުމުތަކުން ވަނީ ދެކޮޅު ހަދާފައެވެ.
އޭއެފްސީގެ އެގްޒެކެޓިވް ކޮމިޓީގެ މެންބަރު އަދި ލުބްނާނުގެ ފުޓްބޯޅަ އެސޯސިއޭޝަންގެ ރައީސް ހަކީމް ހައިދަރުއާ ހަވާލާދީ މީޑިއާ ރިޕޯޓްތައް ބުނާ ގޮތުގައި ބުރާސްފަތި ދުވަހު އޮންނަ އޭއެފްސީގެ އެކްސްކޯ ބައްދަލުވުމުގައި، ކޮމްޕެޓިޝަން ކޮމިޓީގެ ހުށަހެޅުމާއި މެދު ގޮތެއް ނިންމާނެއެވެ. މި ބައްދަލުވުން އޮންނާނީ ވަރޗުއަލްކޮށެވެ.
މި މުބާރާތުގައި ރާއްޖޭން މި ފަހަރު ވާދަކުރަނީ މާޒިޔާއާ ޓީސީއެވެ. ރާއްޖޭގެ މާޒިޔާއާ ޓީސީ ހިމެނޭ ގްރޫޕުންވެސް ބަންގްލަދޭޝް އަދި އިންޑިޔާގެ ފުޓްބޯޅަ ފެޑެރޭޝަނުން މުބާރާތް ކުރިއަށް ގެންދަން ބޭނުން ނުވުމުން ރާއްޖޭގައި މުބާރާތް ބޭއްވުމަށް އެފްއޭއެމުން ވަނީ ޝައުގުވެރިކަން ފާޅުކޮށްފައެވެ. އެހެންނަމަވެސް ކޮވިޑުގެ ކަންތަކާއި ގުޅިގެން، ރާއްޖޭގައި މުބާރާތް ކުރިއަށް ގެންދަން ހުއްދަދޭނެ ކަމާއި މެދު ސުވާލު އުފެދިފައިވަނިކޮށް އެހެން ބައެއް ގްރޫޕްތައް ނިސްބަތްވާ ގައުމުތަކުންވެސް މުބާރާތް ކުރިއަށް ނުގެންދެވޭނެ ކަމަށް އޭއެފްސީއަށް ވަނީ އަންގާފައެވެ. އޭއެފްސީގެ ޖެނެރަލް ސެކެޓްރީ ސޮއި ކުރައްވާ މެންބަރު އެސޯސިއޭޝަންތަކަށް ފޮނުވި ސިޓީގައި މިކަން ބަޔާންކޮށް ދެން މުބާރާތް ކުރިއަށް ގެންދާނެ ގޮތަކާއި މެދު ގޮތްތަކެއް ނިންމާނެ ކަންވަނީ އަންގާފައެވެ.