ނ. އަތޮޅު ހޮސްޕިޓަލްގެ މެނޭޖަރު އިސްމާއިލް ޝަފީގް ސީއެންއެމްއަށް ވިދަޅުވީ ކޮންޓެކްޓް ޓްރޭސިންގެ ދަށުން 26 މީހަކު ކަރަންޓީނު ކުރެވިފައިވީ ނަމަވެސް އެއްވެސް މީހެއްގެ ފަރާތުން ބަލީގެ އަލާމާތް އަދި ފެނިފައި ނުވާ ކަމަށެވެ.
ކަރަންޓީން ކުރެވިފައިވާ މީހުންގެ ތެރޭގައި ހައި ރިސްކް ދެމީހަކު އުޅޭ ކަމަށާއި އެއްވެސް މީހެއްގެ އަލާމާތެއް އަދި ފެނިފައި ނުވާ ކަމަށް ވެސް ވިދާޅުވި އެވެ.
މަނަދޫ މޮނިޓަރިންގެ ހާލަތަށް ލާފައި ވަނީ އެރަށުގައި ފުރަބަންދު ކަރަންޓީނުގައި ހުރި މީހަކު މިމަހުގެ 11 ވަނަ ދުވަހު ކޮވިޑް-19 އަށް ޕޮޒިޓިވްވުމާއި ގުޅިގެން އެޗްޕީއޭއިން ވަކި އެއްޗެއް އަންގަންދެންނެވެ. މަނަދޫއިން ކޮވިޑަށް ޕޮޒިޓިވްވެފައި ވަނީ ދިވެހި ފިރިހެނެކެވެ.
އެކަމާ ބެހޭ ގޮތުން ވާހަކަ ދައްކަަވަމުން ޝަފީގް ވިދާޅުވީ އެމީހާ ކަރަންޓީންގެ މުއްދަތު ހަމަވަމުން ނެގި ސާމްޕަލްތަކުން ބައްޔަށް ޕޮޒިިޓިވް ވުމާއިއެކު ކަރަންޓީނުގައި ބަހައްޓާފައިވާ މީހާއަށް އެކަން އަންގަން ބެލިއިރު އެމީހާ ކަރަންޓީނު ކޮށްފައި ހުރި ތަނުގައި ނެތް ކަމަށާއި ފުލުހުންނަށް އޭނާ ފެނިފައިވަނީ ދޯންޏެއްގައި ބަޔަކާއިއެކު ފީނަން ގޮސް އުޅެނިކޮށް ކަމަށެވެ.
ޝަފީގް ވިދާޅުވީ މިހާތަނަށް ހެދި ކޮންޓެކްޓް ޓްރޭސިންގައި ރަށުން ބޭރުން އެމީހާއާ ކޮންޓެކްޓުވެފައި ވަނީ ނ. މާފަރުގެ މީހަކާ ކަަމަށެވެ.
މަނަދޫއިން ގިނަ އަދަދެއްގެ ބަޔަކު ކަރަންޓީނަށް ލާން ޖެހިފައި ވަނީ ކަރަންޓީން ގައި ބަހައްޓާފައި ވަނިކޮށް ނަތީޖާ ނުލިބެނީސް ބޭރުގައި އުޅުމުގެ ސަބަބުންކަން ޝަފީގް ފާހަގަކުރެއްވި އެވެ.
މަނަދޫއިން މީގެ ކުރިން ވެސް ފުރަބަންދު ކަރަންޓީނުގައި ތިބި ބަޔަކު ޕޮޒިޓިވްވުމާއި ގުޅިގެން މޮނިޓަރިންގެ ހާލަތަށް ގެނެސްފައި ވެއެވެ.
ރާއްޖެއިން މިހާތަނަށް ކޮވިޑް-19 އަށް ޕޮޒިޓިވްވީ މީހުންގެ ޖުމްލަ އަދަދަކީ 9052 މީހުންނެވެ. އަދި ރޭ ފަތިހު 03:55 ހާއިރު ހުޅުމާލޭ މެޑިކަލް ފެސިލިޓީ އައިސީޔޫގައި ފަރުވާދެމުން އައި 58 އަހަރުގެ ދިވެހި އަންހެނެއް ކޮވިޑް-19 ގައި ވަނީ މަރުވެފައެވެ. މިއީ ރާއްޖެއިން ކޮވިޑް-19 ގައި މަރުވި 32 ވަނަ މީހާ އެވެ.