އެ ގައުމުގެ ސިނޮވެކް ބަޔޮޓެކް ކުންފުނިން އުފެއްދި އެ ވެކްސިން އާއްމުންނަށް އެންމެ ފުރަތަމަ ދައްކާލާފައިވަނީ ބެއިޖިންގައި މިމަހު ކުރިއަށްދިޔަ ޓްރޭޑް ފެއާގައެވެ. އެ ވެކްސިން އާއްމުކޮށް މިއަހަރުގެ ފަހުކޮޅު ބޭނުން ކުރަން ހުއްދަ ދޭނެ ކަމަށް ބެލެވޭއިރު ކުރިއަށް ދަނީ އެ ވެކްސިންގެ ތިންވަނަ މަރުހަލާގެ ތަހްލީލުތައް ކަމަށް އޭރު ބުނެފައިވެއެވެ.
އެ ގައުމުގެ ރިޕޯޓްތަށް ބުނާގޮތުން މިހާރު ވަނީ އެ ވެކްސިން ފުރަތަމަ ފަހަރަށް އިންސާނުންގެ ގަޔަށް ޓެސްޓް ކުރަން ފަށައިފައެވެ. އެގޮތުން ކްލިނިކަލް ޓްރެއިލްގެ ދަށުން މިހާތަނަށް ތިން ވޮލެންޓިއަރެއްގެ ގަޔަށް އެ ވެކްސިން ޓެސްޓް ކޮށްފައިވެއެވެ.
އެ ވެކްސިން އަދި މާކެޓަށް ނެރެފައެއް ނުވެއެވެ. ވެކްސިން އުފެއްދި ސިނޮވެކް ކުންފުނިން ބުނެފައިވަނީ އެކުންފުނިން އުފައްދާފައިވާ ވެކްސިންގެ 300 މިލިއަން ޑޯޒް ކޮންމެ އަހަރަކު ބާޒާރަށް ނެރުމުގެ ގާބިލްކަން މިހާރު ވެސް އެބަހުރި ކަމަށާއި ވެކްސިންގެ ކާމިޔާބުކަން މުޅިން ކަށަވަކުރެވި ވެކްސިން ރަސްމީކޮށް ބޭނުން ކުރުމުގެ ހުއްދަ ލިބިއްޖެނަމަ ވެކްސިން އުފެއްދުމުގެ ކެޕޭސިޓީ އިތުރު ކުރާނެ ކަމަށެވެ.
ބޭރުގެ ރިޕޯޓްތައް ބުނާ ގޮތުން އެ ވެކްސިންގެ އަގު ބޮޑު ނުވާނެ ކަމަށާއި ގާތްގަނޑަކަށް 146 ޑޮލަރަށް ވެކްސިން ގަންނަން ލިބޭނެ އެވެ. ޗައިނާގެ ރައީސް ޒީ ޖިންޕިން ވެސް ވިދާޅުވެފައި ވަނީ ކާމިޔާބު ވެކްސިނެއް ތައާރަފް ކުރެއްވިއްޖެ ނަމަ ޗައިނާގެ ރައްޔިތުންނާއި އެއްވަރަށް ދުނިޔޭގެ ވެކްސިނަށް އެންމެ ބޮޑަށް ބޭނުން ޖެހިފައިވާ ގައުމުތަކަށް ވެކްސިން ފޯރުކޮށްދިނުމަށް ވެސް އިސްކަންދެއްވާނެ ކަމަށެވެ.
ސިނޮވެކްގެ ވެކްސިނަކީ ކޮވިޑް-19 އިން ރައްކާތެރި ވެވޭނެ ވެކްސިނެއް ކަަމަށް ރިޕޯޓްކޮށްފައިވެ އެވެ.