ދުނިޔޭގެ އެންމެ އަގުބޮޑު ކްރިކެޓް މުބާރާތް ކަމަށްވާ، އިންޑިއަން ޕްރިމިއާ ލީގު- އައިޕީއެލް، މިރޭ މި ފަށަނީ ކޮވިޑުގެ ނުރައްކަލާ ހުރެ އެކި ފަހަރު މަތިން މުބާރާތް ލަސްކުރުމަށް ފަހުއެވެ. އެންމެ ފުރަތަމަ މުބާރާތް ފަށަން އޮތީ މާރިޗު މަހު އެވެ.
އިންޑިޔާގައި މުބާރާތް ބޭއްވޭނެ އެއްވެސް ފުރުސަތެއް ނެތުމުން ޔޫއޭއީގައި މުބާރާތް ބާއްވަން ނިންމީ، އަވަށްޓެރި ލަންކާއިންވެސް މުބާރާތް ހޯސްޓްކޮށްދިނުމަށް އެދި ހުށަހަޅާފައިވަނިކޮށެވެ. މީގެ ކުރިންވެސް އެއް ފަހަރު މުބާރާތް އިންޑިއާއިން ބޭރުގައި ބާއްވާފައިވެއެވެ. އެހެންކަމުން މިއީ ތޭރަ އަހަރުވީ މުބާރާތް އިންޑިޔާއިން ބޭރުގައި ބާއްވާ ދެވަނަ ފަހަރެވެ. 2009 ވަނަ އަހަރު މުބާރާތް ބާއްވާފައިވަނީ ސައުތު އެފްރިކާގައެވެ.
ރައްކާތެރިކަމުގެ ފުރިހަމަ ފިޔަވަޅުތަކާއި އެކު މުބާރާތް ފެށުމުގެ ހުރިހާ އިންތިޒާމެއް ޔޫއޭއީގައި މިހާރުވަނީ ފުރިހަމަކޮށްފައެވެ. މުބާރާތުގައި ވާދަކުރާ އަށް ޓީމުވެސް ޔޫއޭއީއަށް ގޮސް މިހާރު ކޭމްޕުކޮށް، ޕްރެކްޓިސްތައްވެސް ފަށައިފިއެވެ. މުބާރާތުގެ ފައިނަލް މެޗު އޮންނާނީ ނޮވެމްބަރު މަހުގެ ވިހި ވަނަ ދުވަހު އެވެ.
އައިޕީއެލް ޓުވެންޓީ ޓުވެންޓީ ކްރިކެޓް މުބާރާތުގައި އިންޑިއާގެ އަށް ސްޓޭޓަކުން ވާދަކުރާއިރު ސްޓޭޓްތަކުގެ ޓީމުތަކުގައި ދުނިޔޭގެ އެންމެ މޮޅެތި ކްރިކެޓް ކުޅުންތެރިން ވާދަކުރެ އެވެ. ދެހާސް ހަތްވަނަ އަހަރުން ފެށިގެން ކުރިއަށްދާ އެ މުބާރާތަކީ ދުނިޔޭގެ އެންމެ އަގުބޮޑު ކުޅިވަރު މުބާރާތްތަކުގެ ތެރޭގައި ވެސް ހިމެނޭ މުބާރާތެކެވެ.