ހިޔާ މަޝްރޫއުގެ ދަފްތަރު ކެޓްގަރީގެ ދަށުން ފްލެޓް ލިބުނު މީހުންގެ ވަގުތީ ލިސްޓު އާންމުކުރުމާއެކު މުއިއްޒު ވިދާޅުވީ އެކުގައި އެއްތަނެއްގައި އުޅޭ ދެމަފިރިންނަށް އެކަކު އަނެކަކަށް ތަފާތުކޮށް ދިރިއުޅުމުގެ ހާލަތަށް ޕޮއިންޓްދީފައިވާ ކަމަށެވެ. އެގޮތުން މިއަދު ނެރުނު ލިސްޓުގައި އެކަން ވަރަށް ބޮޑަށް ދިމާވެފައިވާތީ ރައްޔިތުން ކަންބޮޑުވުން ފާޅުކުރާ ކަމަށް ވެސް ވިދާޅުވި އެވެ.
އަދި އެގޮތަށް އެކަން ދިމާވީ ކީއްތޯ މުއިއްޒު ވަނީ ސުވާލު އުފައްދަވާފަ އެވެ.
ކުރީގެ ރައީސް އަބްދުﷲ ޔާމީނުގެ ވެރިކަމުގައި ހުޅުމާލޭ ދެވަނަ ފިޔަވަހީގައި ތަރައްގީކުރި ހިޔާ ފްލެޓުތައް ލިބޭ މީހުންގެ ވަގުތީ ލިސްޓުތައް އާންމުކޮށް ދަނީ ޝަކުވާ ހުށަހެޅުމަށް ހުޅުވާލަމުންނެވެ.
އެތަންތަނުގެ ދޮރާއި ތަށިމުށި އަދި ލައިޓް ހަރުނުކޮށް މީހުންނަށް ހަވާލުކުރަން ނިންމާފައިވާއިރު އެ ފްލެޓުތަކަކަށް މީހުންނަށް ވަދެވޭވަރުވާނީ އަންނަ އަހަރު ކަމަށް ސަރުކާރުން ބުނެ އެވެ.