ޓީޗަރުންނާއި ސްޓާފުން ސްކޫލަށް ދިއުމުގެ ކުރިން ކޮވިޑް ޓެސްޓް ހަދަން ޖެހޭ ކަމަށް ގަވާއިދުގައި އޮންނާތީ އެގޮތަށް ކޮވިޑް ޓެސްޓް ނުހަދާ ޓީޗަރުންނާއި މުވައްޒަފުންނަށް އޮތީ ކޮންގޮތެއްތޯ އެޗްއޯސީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލުގެ ޖަވާބުގައި އެޑިއުކޭޝަން މިނިސްޓަރު އައިޝަތު އަލީ ވިދާޅުވީ ކޮވިޑް ޓެސްޓް ހެދުމަކީ އޮޕްޝަނަލް ކަމެއް ކަމަށެވެ.

އަދި އެގޮތަށް މާލޭ ސަރަހައްދުގައި ކޮވިޑް ޓެސްޓް ހަދަނީ ބެލެނިވެރިންނަށް އިތުރަށް ޔަގީންކަން ދިނުމަށް ކަމަށާއި ޓެސްޓް ހެދުމުން ސްކޫލަށް އައިސް ކިޔަވައިދޭން ހުންނަ ޓީޗަރަކީވެސް ކޮވިޑްް-19 އަށް ޕޮޒިޓިވް ނޫން ސިއްހީ ގޮތުން ރަނގަޅު ޓީޗަރެއް ކަމުގެ ޔަގީންކަން ބެލެނިވެރިންނަށް ލިބިގެންދާނެ ކަމަށެވެ. 

އަދި ދަރިވަރުން ވެސް އެޗްޕީއޭގެ ގައިޑްލައިންއާއި އެއްގޮތައް ޓެސްޓް ހަދަން ޖެހިއްޖެ ހާލަތެއްގައި ޓެސްޓް ހެދޭނެކަން މިނިސްޓަރު ފާހަގަކުރެއްވި އެވެ.

އެކަމާއި ގުޅޭ ގޮތުން އެޗްއީއޯސީގެ ތަރުޖަމާން ޑރ. ނަޒްލާ ރަފީގް ވިދާޅުވީ ސްކޫލް ޓީޗަރުން ޓެސްޓް ކުރުމަކީ ސްކޫލްތަކަށް ހާއްސަކުރެވިފައިވާ ގައިޑްލައިންކުގެ އިތުރުން ރައްކާތެރިކަމުގެ ގޮތުން އެޗްޕީއޭ އާއި އެޑިއުކޭޝަން މިނިސްޓްރީ އާއި ގުޅިގެން ހިންގޭ ކަމެއް ކަމަށެވެ. 

އެންމެން ޓެސްޓް ކުރިޔަސް އަދި ނުކުރިޔަސް ސްކޫލްތަކުގައި މިހާރު އަމަލުކުރުމަށް ކަނޑައެޅިފަ ހުރި ގައިޑްލައިންތަކަކީ ހުރިހާ މުވައްޒަފުންނާއި ކިޔަވާ ކުދިންގެ ރައްކާތެރިކަމަށްޓަކައި މި ވަގުތަށް އެޅެން ހުރި އެންމެ ރަނގަޅު ފިޔަވަޅުތައްކަން ޑރ. ނަޒްލާ ފާހަގަކޮށްފައި ވެއެވެ.

އޭގެ އިތުރުން މިހާރުވެސް ގުރޭޑް 11 އަދި 12 ގެ ކްލާސްތައް ކުރިއަށް ދާ ކަމަށާއި އަދި މީގެ ކުރިން ގްރޭޑް ނުވަޔަކާއި 10 އެއްގެ ކުލާސްތައް ވެސް ސްކޫލްތަކުގައި ކުރިއަށް ގެންގޮސްފައިވާނެކަން ފާހަގަކުރައްވާ ޑރ. ނަޒްލާ ވިދާޅުވީ އޭރުވެސް ފިޔަވަޅުތަކާއިއެކު ކްލާސްތައް ހިންގިފައި ވާތީ ސްކޫލް ތެރެއިން އިތުރު އިންފެކްޝަންތަކެއް ފެތުރިފައިވާކަން ފާހަގަކުރެވިފައި ނުވާ ކަމަށެވެ. 

ސްކޫލް ތެރެއިން އިންފެކްޝަން އިތުރަށް ފެތުރިފައި ނުވަނީ ދަރިވަރުންނާއި ޓީޗަރުން ވެސް މާސްކު އެޅުމާއި ގައިދުރުކަން ބެހެއްޓުމަށް ވަރަށް ބޮޑަށް ސަމާލުކަން ދިނުމުންކަން ޑރ.ނަޒްލާ ފާހަގަކުރެއްވި އެވެ.