ރައްޔިތުންގެ މަޖިލީހުގެ އާންމު ކޮމިޓީގެ މިއަދުގެ ބައްދަލުވުމުގައި ވަނީ މަޖިލީހުގެ ޖަލްސާކުރާ މާލަމުގައި މެންބަރުން އިށީދެވަޑައިގަންނަވާ ތަރުތީބު ބަދަލުކުރެއްވުމާ ގުޅޭގޮތުން މަޝްވަރާ ކޮށްފަ އެވެ.
އެގޮތުން އެހެން ގައުމުތަކުގެ މަޖިލީހުގައި މެމްބަރުން ތިބޭގޮތާއި ގުޅޭގޮތުން މަޖިލީހުގެ އިދާރާއިން ތައްޔާރުކޮށްފައިވާ ރިޕޯޓެއް ކޮމިޓީގައި އިއްވާފައިވެ އެވެ.
ކޮމިޓީގައި ވާހަކަ ދައްކަވަމުން ކޮމިޓީގެ މުގައްރިރު ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ މަޖިލީހުގައި މިހާރުވެސް މަސައްކަތް ކުރަމުން އަންނަނީ އަތޮޅުތަކަށް ވާގޮތަށް ނޫން ކަމަށާއި މަސައްކަތްކުރަމުން އަންނަނީ ޕާޓީތަކަށް ނިސްބަތްވާގޮތަށް ކަމަށެވެ.
މިއަދުގެ ކޮމިޓީ ބައްދަލުވުމުގައި ވާހަކަ ދައްކަވަމުން ފުނަދޫ ދާއިރާގެ މެމްބަރު މުހައްމަދު ޝާހިދު ވިދާޅުވީ އުތުރުން ދެކުނަށް ވާގޮތަށް ގޮނޑިތައް ތަރުތީބުކުރުމަކީ އަތޮޅުތަކުގެ ތަރުތީބުން އެއްހަމަ އެއްގައި ހިފެހެއްޓުމަށް ފަސޭހަވާނެ ގޮތެއް ކަމަށެވެ. އަދި މިހާރު ސިޔާސީ ޕާޓީތައް ހުރި ގޮތުން ޕާޓީ ތަރުތީބުން މެމްބަރުން ތަޅުމުގައި އަތުރަން ފަސޭހަ ނުވާނެ ކަމަށެވެ.
ކޮމިޓީގެ މިއަދުގެ ބައްދަލުވުން ނިންމާލީ ދެ ގޮތް ވެސް ހިމަނައިގެން ކޮމިޓީ ރިޕޯޓް އެކުލަވާލުމަށް އަލުން ކޮމިޓީ ބައްދަލުވުމެއް ބޭއްވުމަށެވެ.