ޖުމްހޫރީ ޕާޓީގެ ލީޑަރު ގާސިމް ވަނީ މިދިޔަ ބުދަ ދުވަހު އިތުރު ކައިވެންޏެއްކުރައްވާފަ އެވެ. މިިފަހަރު ކައިވެނި ބައްލަވައިގެންފައި ވަނީ އެމަނިކުފާނު ނިސްބަތްވެވަޑައިގަންނަވާ އދ. މާމިގިއްޔަށް ނިސްބަތްވާ ރާނިޔާ އަހްމަދުއާ އެވެ.
އުމުރުފުޅުން 71 އަހަރުގެ ގާސިމް ރާނިޔާއާ ކައިވެނި ބައްލަވައިގެން ފަހުން، ރާނިޔާ ކަމަށް ބުނެ، ޝޯޝަލް މީޑިއާގައި ސްކްރީންޝޮޓްތަކާއި ފޮޓޯތަކެއް ބޭނުންކޮށްގެން އަނބިކަނބަލުން ބަނދުނާމުވާގޮތައް ބައެއް ފަރާތްތަކުން ވާހަކަދައްކަމުންދާތީ ގާސިމް ވަނީ އެކަން ކުށްވެރިކޮށް ޓްވީޓް ކުރައްވާފަ އެވެ.
ގާސިމް ވިދާޅުވީ އެކަމަކީ މީގެ ތިން އަހަރެއްހާ ދުވަސްކުރިން ރާނިޔާގެ ފޭސްބުކް އެކައުންޓް ހެކްކުރި މީހުން އުފައްދައިގެން އުޅޭ ލިޔުމާއި ފޮޓޯއެއް ކަމަށެވެ. އަދި އެކަން އޭރުވެސް ފުލުހުންނަށްވެސް އެނގޭނެކަމަށާއި އެއީ ރާނިޔާ ބްލެކްމެއިލް ކުރަން ކުރިކަމެއް ކަމަށެވެ.
އާ ކައިވެންޏެއް ކުރެއްވިއިރު އެ ކައިވެނި ކުރެއްވީ ގާސިމްގެ އެންމެ ހަގު އަނބިކަނބަލުންގެ ގޮތުގައި އޭރު އިންނެވި ޓްރާންސްޕޯޓް މިނިސްޓަރު އައިޝަތު ނަހުލާ ވަރި ކުރައްވާފައިކަމަށްވެސް އޭރު އަޑުތައް ފެތުރުނެވެ. އެހެންމަނަވެސް އިތުރު ކައިވެންޏެއް ކުރެއްވީ ނަހްލާގެ ރުހުމުގައިކަން ފަހުން އެނގިފައިވެއެވެ.
ނަހުލާ އާއި އެހެން އަނބިކަނބަލުންނަށް ވެސް ގާސިމްގެ ބޭފުޅުން ތިއްބަވަ އެވެ.