ހަ އަހަރު ދުވަހު ބާސެލޯނާއަށް ކުޅުމަށް ފަހު އެ ކްލަބުން ދޫކޮށްލުމުން އެތްލެޓިކޯއަށް މިހާރު ކުޅޭ ސުއަރޭޒް ބުނި ގޮތުގައި އޭނާ ބާސާގައި ހޭދަކުރި އެންމެ ފަހު ދުވަސްކޮޅަކީ ވަރަށް ހިތްދަތި ދުވަސްކޮޅެކެވެ. އަދި އެ ހިތްދަތިކަމުގައި އެތައް ދުވަހަކު ގެއަށް ގޮސް އެތައް އިރަކު ރޯން ޖެހުނު ކަމަށްވެސް ސުއަރޭޒް ބުންޏެވެ.
ބާސާއިން ސުއަރޭޒް ދޫކޮށްލުމުގެ މަރުހަލާގައި ކަންތައް ކުރި ގޮތާއި މެދު އެ ކްލަބުގެ ކެޕްޓަން މެސީ ވެސްވަނީ ހިތްހަމަ ނުޖެހިފައެވެ. މެސީ ބުނެފައިވަނީ ކްލަބް ދޫކޮށްލިއިރު ސުއަރޭޒަށް ހައްގުވާ ވަރުގެ މަސައްކަތެއް ބާސެލޯނާ އިން ކޮށްދީފައިނުވާ ކަމަށެވެ.
އުމުރުން 33 އަހަރުގެ ސުއަރޭޒްގެ ކޮންޓްރެކްޓްގައި ބާކީ އަހަރެއް އޮއްވާ ބާސާއިން ކޮންޓްރެކްޓް ބާތިލުކުރުމުން ސުއަރޭޒް ބަދަލުވީ ވާދަވެރި އެތްލެޓިކޯއަށެވެ. 2014 ވަނަ އަހަރު ބާސެލޯނާ އަށް ބަދަލުވި ސުއަރޭޒްވަނީ އެ ޓީމާއި އެކު 13 މުބާރާތް ކާމިޔާބުކޮށްފައެވެ. އަދި ބާސާގެ ތާރީޚުގައި އެ ޓީމަށް އެންމެ ގިނަ ގޯލް ޖެހި ތިން ކުޅުންތެރިންގެ ތެރޭފައި ސުއަރޭޒް ހިމެނެއެވެ.
