ރައްޔިތުންގެ މަޖިލީހުގެ މިއަދުގެ ޖަލްސާގައި ޤާނޫނުލްއުގޫބާތަށް ހުށަހަޅާފައިވާ އިސްލާހާއި ގުޅޭގޮތުން މެމްބަރުން ބަހުސްކުރި އިރު ރައީސް ނަޝީދު ވަނީ ހިޔާނާތުގެ މައްސަލަތަކާއި ގުޅޭގޮތުން ވާހަކަދައްކަވާފަ އެވެ.
އެގޮތުން ވާހަކަ ދައްކަވަމުން ރައީސް ނަޝީދު ވިދާޅުވީ އެންޓި ކޮރަޕްޝަން ކޮމިޝަން (އޭސީސީ)އިން އެމަނިކުފާނުގެ މައްޗަށް ބޮޑު ތަހުގީގެއް ހިންގާ 444 ރުފިޔާގެ މައްސަލައެއް ބެލިކަމަށެވެ. އެހެން ނަމަވެސް އެމްއެމްޕީއާރްސީގެ މައްސަލައިގެ ކަންކަމުގައި ތަހުގީގު ލަސްކަމަށް ވިދާޅުވެ ރައީސް ނަޝީދު ވަނީ އެކަމަށް ފާޑުވިދާޅުވެފައެވެ.
އެގޮތުން ރައީސް ނަޝީދު ވިދާޅުވީ އެމްއެމްޕީއާރްސީގެ މައްސަލައިގައި ތުހުމަތުކުރެވޭ މީހުން ސާފުކޮށް އިނގެން އޮތްއިރުވެސް އެކަމުގައި އެއްވެސް ދައުވާއެއް ނުއުފުލާ ތިއްބަވާ ސަބަބެއް ސާފުނުވާ ކަމަށެވެ. އަދި ވިދާޅުވީ އެމްއެމްޕީއާރްސީގެ މައްސަލައާ ގުޅޭ 70،000 މެސެޖު މަޖިލީހަށާއި އޭސީސީއަށް އަރުވާފައިވާ ކަމަށެވެ.
އެމްއެމްޕީއާރްސީގެ ހިޔާނާތުގެ ކަންކަމުގައި ކުރީގެ ނައިބުރައީސް އަދީބު އިއުތިރާފްވި އިރު އެތައް ވާހަކައެއް ދައްކަވާފައިވާކަން ފާހަގަކޮށް ރައީސް ނަޝީދު ވިދާޅުވީ އެ ވާހަކަތަކާއި މަޖިލީހަށް ހުށަހަޅާފައިވާ މެސެޖުތަކާއި ވާ ގުޅުންވެސް ސާފުވާނެ ކަމަށެވެ. އަދި އެކަމުގައި ވަކި ކޮޅެއްގައި ނުޖެހިވާތީ ކަންބޮޑުވާކަމަށް ރައީސް ނަޝީދު ވިދާޅުވި އެވެ.
މީގެ އިތުރުންވެސް ވާހަކަ ދައްކަވަމުން ރައީސް ނަޝީދު ވިދާޅުވީ ހިޔާނާތާ ގުޅޭ 70،000 މެސެޖު މަޖިލީހުގައި ފައިލް ކުރެވިފައިވާ ކަމަށެވެ. އަދި އެއީ އެމަނިކުފާނުގެ އަތުގައި ހުރި މައުލޫމާތުކަމުން އެތަކެތި އާންމު ކުރައްވާނޭ ކަމަށް ވެސް ވިދާޅުވި އެވެ.