"ނޫސްވެރިކަމުގެ އަސާސީ ޕްރޮގްރާމް 2020" ނިންމުމުގެ ގޮތުން ވާޗުއަލްކޮށް ބޭއްވި ރަސްމިއްޔާތު ޕީޖީ ޝަމީމް ވިދާޅުވީ މިނިވަން ނޫސްވެރިކަމަކީ މިނިވަން ޑިމޮކްރަސީއެއްގައި ކަށަވަރު ކޮށްދޭންޖެހޭ އެންމެ މުހިންމު އެއް އަސާސު ކަމަށެވެ.

ނޫސްވެރިކަމުގެ ހައްގަކީ ވަރަށް ބޮޑު ބާރެއްކަން ފާހަގަކޮށް ޕީޖީ ޝަމީމް ވިދާޅުވީ އެ ބާރު ބޭނުން ކުރާއިރު އެއްވެސް ހަމައެއް ނެތި ބޭނުންކުރުމަކީ ކޮށްގެންވާނެ ކަމެއް ނޫން ކަމަށެވެ. އަދި ވިދާޅުވީ ނޫސްވެރިކަމުގެ އަސާސީ ހައްގާއިއެކު ޒިންމާތަކެއްވާ ކަން ގަބޫލުކުރަންޖެހޭ ކަމަށެވެ. 

ގާނޫނުއަސާސީގައި ވެސް ކޮންމެ ރައްޔިތަކަށް އަބުރު ރައްކާތެރިކުރުމުގެ މިނިވަންކަން ލިބިގެންވާކަން ބަޔާންކޮށްފައިވާ ކަމަށާއި، އެހެން ކަމުން ނޫސްވެރިކަމުގެ މިނިވަންކަމުގެ ނަމުގައި މީހުންގެ އަބުރު ކަތިލާ މީހުންނާއި މެދު ނުބައި ތަސައްވުރެއް އުފެދޭގޮތަށް ވާހަކަދެއްކުމަކީ ކޮންގެންވާނެ ކަމެއް ނޫންކަމަށް ޕީޖީ ޝަމީމް ވިދާޅުވި އެވެ. 

ސަރުކާރުގެ ފަރާތުން މަޖިލީހަށް ހުށަހެޅުމަށް ނިިންމާފައިވާ "އަބުރާބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލު" އާއި ގުޅިގެން ނޫސްވެރިންގެ ކަންބޮޑުވުން އޮތްކަން ފާހަގަކޮށް ޝަމީމް ވިދާޅުވީ އެގޮތަށް އެ ކަންބޮޑުވުންތައް އޮތީ މީގެ ކުރިން ކަންކަން ވެފައިވާ ގޮތުން ކަމަށެވެ. 

އެހެން ނަމަވެސް، ކޮންމެ މީހަކަށް ވެސް އަބުރު ރައްކާތެރިކުރުމުގެ ހައްގު ގާނޫނުއަސާސީން ލިބިދީފައިވާއިރު، ދައުލަތުގެ ތެރޭގައި އެކަން ތަންޒީމުކުރެވިފައި އޮންނަން ޖެހޭ ކަމަށެވެ. އަދި ކުރިން އެއީ ޖިނާއީ ކުށެއްގެ ގޮތުގައި އޮތް ނަމަވެސް މަދަނީ ގޮތުން ކޮންޓްރޯލްކޮށް، ތަންޒީމުކުރަންޖެހޭ ކަމެއް ގޮތަށް މިހާރުގެ ފަލްސާފާ ގަބޫލުކުރާ ކަމަށް ޕީޖީ ވިދާޅުވި އެވެ. 

ޕީޖީ ވިދާޅުވީ ނޫސްވެރިކަމުގެ އެތިކްސް އެހާ މުހިންމުކަމަކަށް ވަނީ އެސަބަބާއި ހުރެގެން ކަމަށެވެ. އަދި މީހުންގެ އަބުރާ ބެހޭ ކަންކަމުގައި ތަންކޮޅެއް ސަމާލުވެގެން ކުރިއަށް ދިއުމަކީ ވަރަށް މުހިންމު ކަމެއް ކަމަށް ޕީޖީ ވިދާޅުވި އެވެ. 

ނޫސްވެރިކަމުގެ ތެރޭގައި ބޭނުންކުރެވޭ އެންމެ މުހިންމު ހަތިޔާރަކީ މައުލޫމާތުކަން ފާހަގަކޮށް ޕީޖީ ވިދާޅުވީ މައުލޫމާތު ހޯދާ އެނަލައިޒް ކުރުމުގެ ޝައުގުވެރިކަން ނޫސްވެރިންގެ ކިބައިގައި ހުންނަންޖެހޭ ކަމަށެވެ. 

ޕީޖީ ވިދާޅުވީ އެކިގޮތްގޮތުން މައުލޫމާތު ހޯދުމުގެ ފުރުސަތު އޮންނައިރު އެމަގުން މައުލޫމާތު ހޯދައިގެން ހަބަރު ލިޔުމުގެ ޝައުގުވެރިކަން އުފެއްދުމަކީ މުހިންމު ކަމަށެވެ. އަދި އަބަދުވެސް ދިރާސާ ކުރުމަކީ މުހިންމު ކަމެއްކަމަށް ވިދާޅުވި އެވެ. އަދި އެކަން ކުރެވޭނީ މިހާރަށް ވުރެއް ގިނައިން ފޮތް ކިޔައި އެކި ލިޔުންތައް ކިޔައިގެން ކަމަށެވެ.