އެ މަޝްވަރާތައްކޮށްފައި ވަނީ އެމެރިކާގެ ސެކެޓްރީ އޮފް ސްޓޭޓް މައިކަލް ޕޮމްޕިއޯ މިހާރު ރާއްޖެއަށް ކުރައްވަމުން ގެންދަވާ ދަތުރުގައި ބޭއްވި ރަސްމީ މަޝްވަރާތަކުގަ އެވެ. 

ފޮރިން މިނިސްޓަރު އަބްދުﷲ ޝާހިދާއި ޕޮމްޕިއޯއާ ދެ ބޭފުޅުން ޝެރަޓަން މޯލްޑިވްސް ރިސޯޓުގައި ބޭއްވި މަޝްވަރާތަކުގައި ނިންމެވީ އިންޑޯ ޕެސިފިކް ކަނޑުގެ ސަރަހައްދުގެ ސަލާމަތީ ކަންކަމުގައި ދެ ގައުމުން ގުޅިގެން ކުރިއަށް ދިޔުމަށެވެ. 

އޭގެ ބޭނުމަކީ ކޮމާޝަލް ނުވަތަ ވިޔަފާރީގެ ހަރަކާތްތަކަށް ސުލްހަވެރި އަދި އަމާން ކަނޑުގެ ސަރަހައްދެއް ދެމެހެއްޓުމެވެ. މެރީޓައިމް ސެކުއިރިޓީގެ އިތުރުން ސައިބަ ސެކިއުރިޓީ އާއި ޓެރަރިޒަމް އަދި މޫސުމަށް އަންނަ ބަދަލުތަކުގެ މައްސަލާގައި ވެސް ދެ ގައުމު ގުޅިގެން މަސައްކަތް ކުރަން ވަނީ ނިންމާފަ އެވެ.

ޕޮމްޕިއޯގެ މި ދަތުރަކީ ކޮންމެ އަހަރަކު އިންޑިއާގައި އޮންނަ "ޔޫއެސް-އިންޑިއާ 2+2 މިނިސްޓީރިއަލް ޑަޔަލޮގް" ގެ ތިންވަނަ ބައްދަލުވުމުގައި ބައިވެރިވުމަށް އޮކްޓޯބަރު 25 އިން 31 އަށް އޭޝިއާއަށް ކުރައްވާ ދަތުރެކެވެ.

މި ދަތުރުގައި އިންޑިއާ އާއި ރާއްޖޭގެ އިތުރުން ސްރީލަންކާ އަދި އިންޑޮނޭޝިއާ އަށް ވެސް ވަޑައިގަންނަވަ އެވެ.