މޫސުމާއި ބެހޭ ގައުމީ އިދާރާ، (މެޓް) އިން ވައިޓް އެލާޓް ނެރެފައި ވަނީ މިއަދު މެންދުރު 14:00 އިން ފެށިގެން ރޭގަނޑު 8:00 ގެ ނިޔަލަށެވެ. އެގޮތުން ބޯކޮށްވާރޭވެހުމާއެކު ގުގުރުން އަދި ވިލާގަނޑުގައި ގަޑިއަކު 40 މޭލަށް އެ ސަރަހައްދަށް ވައިގަދަވާނެ ކަމަށް މެޓުން ލަފާކުރެ އެވެ. 

މެޓުން ވަނީ މެދުރާއްޖެތެރެއާއި ދެކުނުގެ އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި އަދި އުތުރުގެ އަތޮޅުތަކަށް، އުތުރާއި އިރުއުތުރުން ގަޑިއަކު 05 މޭލާއި 15 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާކޮށްފަ އެވެ. 

އަދި މެދުރާއްޖެތެރެއާއި ދެކުނު އަތޮޅުތަކުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށާއި އުތުރުގެ ކަނޑުތައް އާދައިގެވަރަކަށް މަޑުވެފައި ވިލާގަނޑުގައި އާދައިގެވަރަކަށް ގަދަވާނެ ކަމަށް ވަނީ ލަފާކޮށްފަ އެވެ. 

އޭގެ އިތުރުން ރާޅުގެ އުސްމިން 3-6 ފޫޓާ ދެމެދުގައި ހުންނާނެ ކަމަށާއި ދެކުނު އަތޮޅުތަކަށް ދިޔަވަރު ބޮޑުވާ ވަގުތުތަކުގައި އުދައިގެ އަސަރުކުރުން އެކަށީގެންވާ ކަމަށް ވަނީ ބުނެފަ އެވެ. އެހެންވެ ހުރިހާ ފަރާތްތަކުންވެސް މޫސުމަށް ސަމާލުވުމަށް އިލްތިމާސްކުރެ އެވެ.