އެއްވެސް ރަހުނަކާއި ނުލާ ދޫކުރާ އެ ލޯން ދައްކާ އަދާ ކުރުމަށް ފަސް އަހަރު ދުވަހުގެ މުއްދަތެއް ދީފައިވާ އިރު، މިހާރު 15 އިންސައްތައިގެ އިންޓްރަސްޓް ރޭޓެއްގައި ބައި މިލިއަން ރުފިޔާއާ ހަމައަށް އެ ލޯންގެ ދަށުން ފައިސާ ލިބިގެންދާނެ ކަމަށް ބީއެމްއެލް އިން ބުނެއެވެ.

ބީއެމްއެލް އިން އެ ލޯނަށް އިތުރު ފަސޭހަތަކެއް ދީފައިވާ އިރު، ކުރީގައި އެ ބޭންކްގައި ރަޖިސްޓްރީ ކޮށްފައިވާ ވިޔަފާރިތައް މެދުވެރިކޮށް އުޅަނދު ގަތުމަށް ލޯން ދޫކޮށްފައިވާ އިރު، މިއަދުން ފެށިގެން ރާއްޖޭގެ ކޮންމެ ވިޔަފާރިއެއް މެދުވެރިކޮށްވެސް އުޅަނދު ގަތުމަށް ލޯން ދޫކުރަމުން ދާނެ ކަމަށް ބީއެމްއެލް އިން ވަނީ ބުނެފަ އެވެ.

އެގޮތުން ހަތަރު ފުރޮޅުލީ އުޅަނދު ފަހަރާއި ސައިކަލުގެ އިތުރުން، އެ ލޯން މެދުވެރިކޮށް މިހާރު ޖެޓްސްކީ އާއި އިންޖީނުލީ ޑިންގީ ގަނެވޭނެ ކަމަށް ބީއެމްއެލް އިން ވަނީ ބުނެފަ އެވެ.

ބީއެމްއެލްގެ ވެހިކަލް ލޯން މެދުވެރިކޮށް އިލެކްޓްރިކް އުޅަނދެއް ނަގާނަމަ، އެ ލޯނާއި ފައިނޭންސިން ރޭޓް 12 އިންސައްތަ އަށް ދަށްކޮށްފައިވާ އިރު، އެގޮތަށް ބޭންކް އިން ނިންމާފައިވަނީ ތިމާވެއްޓާއި ރަށްޓެހި އުޅަނދު ބޭނުންކުރުމަށް ބާރު އެޅުމުގެ ގޮތުން ކަމަށް ބީއެމްއެލް އިން ބުނެއެވެ.