މޯލްޑިވިއަނުން އަންނަނީ ރާއްޖޭގެ 15 ސަރަހައްދަކަށް ދަތުރުތައް ބާއްވަމުންނެވެ. ވީއައިއޭގެ ކްލަސްޓާއަކާއި ގުޅިގެން މޯލްޑިވިއަންގެ ހުރިހާ ފްލައިޓެއް ކެންސަލްވެފައިވާކަމަށް ދައުރުވުމުން ދާ ޕޯސްޓާކާއި ގުޅިގެން މޯލްޑިވިއަނުން ބުނީ ފްލައިޓްތައް ކެންސަލްވި ކަމަށް ބުނެ ސޯޝަލް މީޑިއާގައި މިހާރު ދައުރުވަމުން ދާ ޕޯސްޓަކީ ރަނގަޅު މައުލޫމާތެއް ނޫން ކަމަށެވެ.
އަދި އެއްވެސް ދަތުރުކަށް ބަދަލެއް އަތުވެއްޖެނަމަ މޯލްޑިވިއަންގެ ޓީމުން އެކަން އަންގަމުންދާނެކަމަށެވެ.
މިދިޔަ ބުރާސްފަތި ދުވަހު ރަސްމީކޮށް ހުޅުވާފައިވާ ހޯރަފުށީ އެއާޕޯޓަށް ޑިމާންޑް ބޮޑުވުމުގެ ސަބަބުން އެ އެއާޕޯޓަށް މިމަހު އިތުރު ފްލައިޓެއް ވެސް ވަނީ ޝެޑިއުލްކޮށްފައެވެ. މޯލްޑިވިއަންގެ ޕީއާރު އެންޑް ކޮމިއުނިކޭޝަންސް މެނޭޖަރު މޫސާ ވަސީމް ވިދާޅުވީ ޑިމާންޑް ބޮޑުވެ މިމަހުގެ 28 ވާ ހޮނިހިރު ދުވަހަށް އިތުރު ފްލައިޓެއް ޝެޑިއުލްކޮށްފައިވާ ކަމަށެވެ. އަދި މި ހަފްތާގެ ބުރާސްފަތި ދުވަހުގެ ފްލައިޓާއި އެ ދުވަހު ހޯރަފުށިން މާލެއަށް އޮތް ފްލައިޓް ވެސް ފުލްވެފައިވާ ކަމަށް މޫސަ ވިދާޅުވެ އެވެ.