މި އަހަރު ދިރާގުން ނެރުނު ލައިފްސްޓައިލް އެޕް ކަމަށްވާ "ނައުއެމްވީ" މެދުވެރިކޮށް ފަސޭހަ ކަމާއި އެކު އެންޖީއޯތަކަށް އެހީތެރިކަން ފޯރުކޮށްދެވޭނެ ގޮތް އިއްޔެ ދިރާގުން ހަމަޖައްސާފައިވާ އިރު، އެ އެންޖީއޯތަކުން ބާއްވާ ފަންޑްރެއިޒް ކުރުމުގެ ކެމްޕޭންތަކަށްވެސް ފަސޭހަ ކަމާއިއެކު އެހީތެރިކަން ފޯރުކޮށްދެވޭނެ ކަމަށް ދިރާގުން ބުނެއެވެ.
ދިރާގުގެ "ނައުއެމްވީ" އެޕްގައި މިހާތަނަށް ހަތަރު އެންޖީއޯ އެއް ލިސްޓްކުރެވިފައިވާ އިރު، ކޮންމެ އެންޖީއޯ އަކަށް ވެސް ހާއްސަ ފަންޑްރެއިޒާ އެއް ހުޅުވާލެވިފައިވާ ކަމަށާއި، ކުރިއަށް އޮތް ދުވަސްތަކުގައި އިތުރު އެންޖީއޯތައްވެސް ލިސްޓް ކުރެވިގެން ދާނެ ކަމަށް ދިރާގުން ވަނީ ބުނެފަ އެވެ.
ދިރާގުން މިގޮތަށް ނިންމާފައި ވަނީ ކޮވިޑް-19 ގެ ބަލިމަޑުކަމުގެ ސަބަބުން ގިނަ އެންޖީއޯތަކުގެ މަސައްކަތްތަކަށް ފަންޑްރެއިޒް ކުރުމަށް ދަތިތަކާއި ކުރިމަތިވެފައި ވާތީ އެ ފަރާތްތަކަށް ފަސޭހަކަމާއި އެކު އެހީތެރިކަން ފޯރުކޮށްދިނުމުގެ މަގު ތަނަވަސް ކޮށްދިނުމަށް ކަމަށް ދިރާގުގެ ބިޒްނެސް ޑިވެލޮޕްމެންޓް މެނޭޖަރު އަހްމަދު ޝިނާއު އަބްދުލްގާދިރު ވަނީ ވިދާޅުވެފަ އެވެ.
މީގެ އިތުރުން، އަލަށް ތައާރަފްކުރި އެ ފީޗާގެ ސަބަބުން އެންޖީއޯތަކުން ކުރާ މަސައްކަތްތަކީ ކޮބައިކަން ދެނެގަނެ، އެޕް މެދުވެރިކޮށް ފަސޭހަކަމާއެކު ބޭނުންވާ އެންޖީއޯތަކަށް ފައިސާގެ އެހީތެރިކަން ފޯރުކޮށްދެވޭނެ މަގުފަހިވެގެން ދާނެ ކަމަށް ވެސް ދިރާގުން ބުނެއެވެ.
ނައުއެމްވީ އެޕް މެދުވެރިކޮށް އެހީތެރިކަން ފޯރުކޮށްދެވޭނީ ދިރާގުގެ ޕޭމެންޓް ހިދުމަތް ކަމަށްވާ ދިރާގު ޕޭ މެދުވެރިކޮށެވެ.