ފަނޑިޔާރުންގެ ޖަމްއިއްޔާއިން ނެރެފައިވާ ނޫސްބަޔާނެއްގައި ބުނީ "ދިޑެއިލީ" އޮންލައިން ނޫހުގައި މިއަހަރުގެ ނޮވެންބަރު 22 ވަނަ ދުވަހު ޝާއިއުކޮށްފައިވާ ލިއުމުގައި، ރާއްޖޭގެ ސުޕްރީމް ކޯޓުގެ ފަނޑިޔާރު، "އަލީ ރަޝީދު އުމުރުގެ ބާކީ އޮތް ދުވަސްތައް ހޭދަކުރަންޖެހޭނީ ޖަލުގަ" ކަމަށް ބުނެ، ޝުޖާއު ވާހަކަ ދައްކާފައިވާ ކަމަށް އެ ލިއުމުގައި ލިޔެފައިވާ ކަމަށެވެ.
އަދި އެވާހަކަތަކަކީ ފަނޑިޔާރު އަލީ ރަޝީދަށް އިންޒާރުދީ ދައްކާފައިވާ ވާހަކަތަކެއް ކަމަށް އެ ޖަމިއްޔާއިން ބުނެފައިވެއެވެ. އެހެންކަމުން ފަނޑިޔާރު އަލީ ރަޝީދަށް އިންޒާރުދީ ޝުޖާއު ދައްކަވާފައިވާ ވާހަކަތަކާއިމެދު އެ ޖަމިއްޔާއިން ކަންބޮޑުވުން ފާޅުކޮށް އެ ވާހަކަތައް އެންމެ ހަރުކަށި ޢިބާރާތުން ކުށްވެރިކުރާކަމަށް ބުނެފައިވެއެވެ.
އެ ޖަމިއްޔާއިން ނެރުނު ބަޔާނުގައި ބުނީ އިންޒާރުދީ ދައްކާފައިވާ އެވާހަކަތަކާ މެދު ކަމާބެހޭ ފަރާތްތަކުންނާއި އިދާރާތަކުން ބަލަންޖެހޭ ކަންކަން ބަލައި އަޅަންޖެހޭ ފިޔަވަޅުތައް އެޅުމަށް އެ ޖަމްއިއްޔާއިން ގޮވާލާ ކަމަށެވެ.