އިއްޔެ ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ބައިޑެން ވިދާޅުވީ އޭނާގެ ވެރިކަމުގެ ފުރަތަމަ ސަތޭކަ ދުވަހު ކޮވިޑް-19 ނިމުމަމަކަށް ނާންނާނެ ކަމަށާއި، ނަމަވެސް މަސައްކަތްކޮށްގެން ކޮވިޑް-19 ގެ މިސްރާބު ބަދަލުކޮށްލެވޭނެ ކަމަށެވެ.
އެމެރިކާގެ ކޮންގްރެސްގައި ހުރިހާ ޕާޓީއެއް ގުޅިގެން މަސައްކަތްކޮށް ކޮވިޑް-19 އާއި ދެކޮޅަށް ފަންޑްކުރުމާއި ބެހޭގޮތުން އެއްބަސްވުމަކަށް ނާދެވިއްޖެ ނަމަ، ކޮވިޑް-19 ގެ ބަލިމަޑުކަމުގެ މުއްދަތު ދިގުލައިގެން ދާނެކަމަށްވެސް ބައިޑެންގެ ވާހަކަފުޅުގައި ފާހަގަކުރެއްވި އެވެ.
އިއްޔެ އެމެރިކާގެ އެފްޑީއޭގެ ރެގިއުލޭޓަރުން ވަނީ ފައިޒާ ކުންފުނިން ހަދާފައިވާ ވެކްސިން އެގައުމުގެ ރައްޔިތުންނަށް ދިނުމަށް ހުއްދަދީ ރިޕޯޓެއް ނެރެފައެވެ.
އިނގިރޭސިވިލާތުން އެ ގައުމުގެ ރައްޔިތުންނަށް އިއްޔެ ވެކްސިން ދޭން ފަށާފައިވާ އިރު، އަންނަ މާޗް މަހުގައި ދެކުނު ކޮރެއާ އިން އެ ގައުމުގެ ރައްޔިތުންނަށް ވެކްސިން ދޭނެ ކަމަށް އެ ގައުމުގެ ސަރުކާރުން ވަނީ ބުނެފަ އެވެ.
އެމެރިކާގައި މިހާތަނަށް 15 މިލިއަން މީހުންނަށް ކޮވިޑް-19 ޖެހިފައިވާ އިރު، 285،000 އަށް ވުރެ ގިނަ މީހުން ވަނީ މަރުވެފަ އެވެ.