ދެހާސް އަށާރަވަނަ އަހަރު ސްޕެއިންގެ ރިއާލް މެޑްރިޑުން އިޓަލީގެ ޔުވެންޓަސްއަށް ރޮނާލްޑޯ ބަދަލުވި ފަހުން، މެސީއާ ރޮނާލްޑޯ އެއް ކުޅުންތެރިއަކު އަނެއް ކުޅުންތެރިއަކާ ދެކޮޅަށް ފުރަތަމަ ފަހަރަށް ނުކުތީ އަންގާރަ ދުވަހުގެ ރޭ ޗެމްޕިއަންސް ލީގުގެ ގްރޫޕް ސްޓޭޖުގެ ފަހު މެޗުގައެވެ. މި މެޗުން ތިން ލަނޑު ސުން ލަނޑުން ޔުވެންޓަސް މޮޅުވި އިރު، ރޮނާލްޑޯވަނީ ދެ ގޯލް ޖަހާފައެވެ.
ރޮނާލްޑޯއާ މެސީގެ ވާދަވެރިކަމުގެ ވާހަކައަކީ ފުޓްބޯޅައިގައި މި ވޭތިވެދިޔަ ދިހަވަރަކަށް އަހަރުގެ އެންމެ ހޫނު އެއް މައުލޫއެވެ. އެހެންނަމަވެސް ރޮނާލްޑޯ ބުނީ، އޭނާ ދުވަހަކުވެސް ވާދަވެރިއެއްގެ ގޮތުގައި މެސީ ނުދެކޭ ކަމަށެވެ. އަންގާރަ ދުވަހުގެ ރޭގެ މެޗަށް ފަހު، ރޮނާލްޑޯއާ ހަވާލާދީ އޭނާގެ މި ވާހަކަތައް މީޑިއާގެ ސަމާލުކަމަށްވަނީ އައިސްފައެވެ.
ޗެމްޕިއަންސް ލީގުގައި އަންގާރަ ދުވަހުގެ ރޭ ރޮނާލްޑޯއާ މެސީ އެއް ކުޅުންތެެރިއެއް އަނެއް ކުޅުންތެރިއަކާ ދެކޮޅަށް ކުޅުނު މެޗަކީ، ސްޕެއިނުން އިޓަލީއަށް ރޮނާލްޑޯ ބަދަލުވީ ފަހުން ދެ ކުޅުންތެެރިންގެ ފުރަތަމަ ކުރިމަތި ލުމެވެ. ބާސާއާ ޔުވެންޓަސްގެ ފުރަތަމަ ލެގުގެ މެޗުގައި ރޮނާލްޑޯ ނުކުޅެއެވެ. އެ މެޗުގައި ލިބުނު ޕެނަލްޓީއަކުން ޔުވެންޓަސް ކޮޅަށް މެސީ ގޯލެއް ޖަހާފައިވާއިރު، ފަހު ލެގުގައި ރޮނާލްޑޯވަނީ ބާސެލޯނާ ކޮޅަށް ދެ ޕެނަލްޓީން ދެ ގޯލް ޖަހާފައެވެ.
