ބޯޑަރު ހުޅުވާލިފަހުން ރާއްޖެއަށް އައި އެއްލައްކަ ވަނަ ފަތުރުވެރިޔާ އަށް މަރުހަބާ ކިއުމަކީ އުފާވާ ކަމެއްކަން ފާހަގަކުރައްވައި، ހަނަފީ ވިދާޅުވީ ރާއްޖޭގެ ފަތުރުވެރިކަން އަންނަނީ މިހާރު ކުރިމަތިވެފައިވާ ދަތި ދަނޑިވަޅުން އަރައިގަންނަމުން ކަމަށާއި، އިތުރު އުންމީދަކާއި، އާ އަޒުމަކާއި، އުފެއްދުންތަކަކާއި އެކު ރާއްޖޭގެ ފަތުރުވެރިކަން އަންނަނީ ދުވަހުން ދުވަހަށް ތަރައްގީ ވަމުން ކަމަށެވެ.
މިއީ ފަތުރުވެރިކަމުގެ ދާއިރާގައި ހަރަކާތްތެެރިވާ ހުރިހާ ފަރާތްތަކުން ގުޅިގެން ހޯދި ކާމިޔާބީއެއްކަން ފާހަގަކުރައްވައި ހަނަފީ ވިދާޅުވީ މިފަދަ ދަތި ދަނޑިވަޅެއްގައިވެސް ގުޅިގެން މަސައްކަތްކޮށްފި ނަމަ، އެތައް ކަންތައްތަކެއް ހާސިލްކުރުމަކީ ފަސޭހަކަމެއް ކަމަށެވެ.
ބޯޑަރު ހުޅުވާލިފަހުން ރާއްޖެއަށް އެއް ލައްކަ ފަތުރުވެރިން އައިސްފައިވާ އިރު، ސަރުކާރުން އަންދާޒާކޮށްފައި ވަނީ މި މަހުގެ 16 ވަނަ ދުވަހުގެ ކުރިން މި މުއްދަތުގައި އެއްލައްކަ ފަތުރުވެރިން ހަމަވާނެ ކަމަށެވެ.
އިމިގްރޭޝަނުން ވަނީ ދާދިފަހުން ފަތުރުވެރިންނަށް އަމާޒުކޮށްގެން "މޯލްޑިވްސް ބޯޑާ މައިލްސް" ގެ ނަމުގައި ފަތުރުވެރިންނަށް ހާއްސަ ލޯޔަލްޓީ ޕްރޮގްރާމެއް ތައާރަފްކޮށްފަ އެވެ.