މާފަންނު ވެސްޓްޕާކު ސަރަހައްދުގައި ބަސް ސްޓޮޕަކާއި ޕާކެއް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އަމްރު ވިދާޅުވީ މި ޕާކަކީ މާލޭގައި ދިރިއުޅޭ މީހުންނަށް ހިތްފަސޭހަ މާހައުލެއް ހޯދައިދިނުމުގެ އިތުރުން ބަހުގެ ހިދުމަތް ހޯދާ މީހުންނަށް ލުއިފަސޭހަކަމާއެކު އެ ހިދުމަތް ލިބޭނެ ގޮތް ފަހިކޮށްދިނުމަށް ހެދި ތަނެއް ކަމަށެވެ.
މި ބަސް ސްޓޮޕާއި ޕާކަކީ އެސްޓީއޯގެ ސީއެސްއާރުގެ ދަށުން ކޮށްފައިވާ މަސައްކަތެކެވެ.
މި މަސައްކަތް ކުރުމުގައި އެސްޓީއޯ އަށް މާލެ ސިޓީ ކައުންސިލް، މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން އަދި ޔޫތު މިނިސްޓްރީގެ ފަރާތުން ބޮޑެ އެހީތެރިކަމެއް ލިބުނުކަން އަމްރު ފާހަގަ ކުރެއްވިއެވެ.
ޕާކު ސަރަހައްދު ޒީނަތްތެރިކޮށް ބެލެހެއްޓުމަށް ހަވާލުކޮށްފައިވަނީ މާލެ ސިޓީ ކައުންސިލާއެވެ.
މިތަނުގައި މަސައްކަތް ކުރުމަށް އެސްޓީއޯގެ އެކި ޑިޕާޓްމަންޓުގެ މުވައްޒަފުން ނިކުތްކަން ފާހަގަ ކުރައްވާ، އެ މުވައްޒަފުންނަށް އަމްރު ޝުކުރުު އަދާ ކުރެއްވިއެވެ.
މާފަންނު ވެސްޓް ޕާކު ސަރަހައްދުގައި އާދިއްތަ ދުވަހުގެ ރޭ އެސްޓީއޯއިން ތަރައްގީކޮށްފައިވާ ޕާކު ފަރުމާކޮށްފައިވަނީ އާއްމުންނަށް ހިތްފަސޭހަކޮށްލެވޭނެހެން އިށީންނާނެ ބެންޗުތަކެއްގެ އިތުރުން އައުޓްޑޯ ޖިމަކާއެކުއެވެ.
މި ސަރަހައްދުގައި އެސްޓީއޯއިން ވަނީ މާލެއާއި ހުޅުލެއާއި ހުޅުމާލެއާ ދެމެދު ދުއްވާ ބަސްތަކަށް ހާއްސަކޮށް އިތުރު ބަސް ސްޓޮޕެއް ތަރައްގީކޮށްފައެވެ.